PSG-a khelh ka hnial lo - Konate

Liverpool defender ṭhangduang Ibrahima Konate chuan Paris St-Germain aṭanga sawmna dawng ta se, a tan hnar a harsat tur thu a sawi chhuak - kum 24 mi defender hi Paris khaw chhuak a ni.

Konate chuan, "PSG-a khelhna chance nei ta ila, ka hnar ang em? tia min zawh chuan, 'Aih' ti ta ila, dawt sawi ka ni ang. Mahse, ka tum ber a nih leh nih loh min zawh chuan, PSG-a khelh tumna hi ka nei hran lo, tih ka sawi duh," a ti.

France tana vawi 13 inlan tawn Konate hian May 2021 khan RB Leipzig aṭangin Liverpool hi a zawm a, a man zat hi pound maktaduai 36 lai ni mah se Reds a zawm tirhah erawh hmun pawimawh a chang nghal lo.

Jurgen Klopp-a'n zawi zawiin a chher hiam a, tunah chuan Reds tan inelna hrang hrangah match 64 a khel tling der tawh a, season kal laiah pawh Merseyside club tan hian match 11 a khel der tawh.

France boss Didier Deschamps pawhin Konate hi an ram team-ah hmun pawimawh a chantir ṭan a, PSG hian France national team-a player langsarte lakluh tuma an beih ṭhin avangin Konate hi an la rim lo ang tih a sawi theih loh.

Paris tlangval Konate chuan, "PSG hian player inhrechiang sa leh France tana lo khel ho tawh an la lut fo a, Paris mipuite leh France ṭantute tan chuan thil lawmawm tak pawh a ni.

"Fan-te hian hetiang hun hi an lo thlir ve reng ṭhin. Mahni khaw club-a kan khaw mi ngei a nih loh pawhin, French player an khelh hian nuam an lo ti ṭhin a ni," a ti a, PSG nena hmeh bel a ni ṭhin chu a hriatthiam thu a sawi.