Mumbai-in Neymar tel lohna Al Hilal an hneh lo

AFC Champions League draw an neih ruala Mizoram thawm ring em em chu, India ramah Neymar a rawn zin dawn tih a ni. ISL club Mumbai City chu Al Hilal nen group khatah an awm a, Saudi Arabia club hian Neymar an neih avangin India rama football fan-te an phur.

Mahse, beisei angin thil a thleng lo. Brazil tana a inlan ṭumin Neymar a inhliam a; DY Patil Sports Stadium, Mumbai-a inkhel turin a zin ve thei lo. Neymar tel lo pawhin Al Hilal hi team ṭha zawk an ni a, ISL club hi second half-a Michael leh Alexandar Mitrovic te goal hmangin an hneh.

Mumbai FC tan Mizo tlangval Lallianzuala Chhangte leh Lalengmawia Ralte (Apuia) ten bul an ṭan a, an khingpui lam erawh season liam taa Fulham striker Aleksandar Mitrovic, Wolves midfielder Ruben Neves, Chelsea defender Kalidou Koulibaly te an ni.

Team pahnih an intlau tih a chiang a, chutichung chuan Lianzuala hmangin mual dinglam sir aṭangin Mumbai an hlauhawm hmasa. ISL club hian goal an venghim ṭha a, player 11 ve vea an khelh laiin goal an chhuah lo.

First half-ah huai taka Mitrovic nam ve sak saktu Mehtab Singh chuan second half-ah Neves tihtluk vangin yellow card vawi hnihna a hmu a, player 10-a an khelh hnuah Al Hilal-in Michael leh Mitrovic te goal hmangin 2-0 in an chak.

Match li khelh aṭangin Mumbai City-in point an hmu lo a, match hnih khelh hmabak la awm mah se an chung chiaha awm Nassaji Mazandaran nen beisei tur an nei tawh lo. Al Hilal erawh Nassaji Mazandaran hnehtu Navbahor nen second round an lut.