Saudi-in Bruno Fernandes an duh

Manchester United captain Bruno Fernandes chu Saudi Arabia lam thuneitute chuan an rama sengluh an duh niin an sawi a, Italian reporter lar, transfer lam hre thei tak Rudy Galetti chuan Saudi Public Investment Fund chuan nipuia lakluh tura list an siamah Bruno hi an telh niin a tarlang.

Dollar tluklehdingawn 700 chuang hausakna nei Saudi PIF hian an ram club langsar Al Nassr, Al Ittihad, Al Ahli leh Al Hilal-ah te 75% share an nei a, Premier League club Newcastle United neitu an ni bawk.

A bik takin an ram club-te tan sum an seng nasa a, nipui transfer hman zawh takah khan an che na hle. Khawvela footballer langsar ber berten sum a tam miau avangin an bawh a, Cristiano Ronaldo bakah Riyad Mahrez, Neymar, Sadio Mane, Karim Benzema leh Roberto Firmino te ho pawh Saudi-ah an khel tawh.

PIF hian Saudi-a seng luh an tum zingah Liverpool chhuanvawr Mohamed Salah leh Manchester City player thiam bik Kevin de Bruyne te pawh an la telh reng, nia sawi a ni a, nipui transfer inhawn rualin hnar phal rual loh khawpa tam sum nen lang leh tura ngaih an ni.

Kum 29 mi Bruno Fernandes hian January 2020 khan euro maktaduai 80 velin United a zawm a, July 2023 khan Harry Maguire thlakin club captain atan ruat a ni. Mahse, tun season-a United result avangin fans leh club legend zingah captain tlak loa ngai an tam a, Bruno tan thil hriat nuam a ni lo ang.

Red Devils a pan hnuah mimal ang chuan che ṭha pangngai viau mah se League Cup nomawi bak chawi a la nei lo a, English club tan hian match 200 khela goal 67 khungin, assist vawi 57 a nei tawh bawk.

Portugal tan vawi 61 inlana goal 18 khungtu hian tun season-ah match 15 khela goal thum khungin, assist vawi thum a nei tawh.