Bellingham dinhmun a chiang lo

Real Madrid chuan zanin dar 1:30 hian Champions League-ah Sporting Braga an mikhual dawn a, Real Madrid midfielder Jude Bellingham inlan theih dawn leh dawn loh a la chiang lo.

Bellingham hi an league match hnuhnung bera Rayo Vallecano nen an inkhelah a inhliam a, a dar hliam hi nimin khan endik niin, he thu buatsaih a nih lai hian a result kan hre hman lo - Vallecano lakah hian a khel tluan a, Braga lakah coach Carlo Ancelotti-a'n a 'risk' leh ngam ang em, tih chu zawhna a ni.

English midfielder hi inlan thei lo pawh ni se, Real tan lungphan lutukna tur niin a lang lo a, match thum an khelh tawhah hnehna an chan vek avangin Champions League round of 16 chu lut ngei tura ngaih an ni.

Bellingham awm loh laia a hmun ruak luah turin Brahim Diaz, Arda Guler leh Luka Modric te pathum aṭangin Ancelotti-a'n duhthlan tur a nei bawk a, Santiago Bernabeu-a Braga ngam lo tur an ni lo.

Hetihrual hian Real hian Bellingham-a 'form' lohin team khaiding zo an nei lo niin a lang a, goal khungtu tur an mamawh - hei hi Vallecano lakah hailanin a awm a, English midfielder hi khel tho mah se 100% a nih miau loh avangin ni dangin a tal na thei lo tih a lang.

Season hman meka Real top scorer Bellingham hian match 14-ah goal 13 a khung tawh a, amah hnaih bertu striker Joselu hian match 14 aṭangin goal nga chiah a la khung!

Tun hnaia contract pek thar Vinicius Junior hian match 11-ah goal thum a khung a, Brazil tana a khelhpui leh contract thar ziak ve tho Rodrygo hian match 15-ah goal hnih chiah a la khung bawk - a tawi zawnga sawi chuan, Bellingham awm loha goal khung tur Real-in an mamawh.

Zaninah pawh Bellingham hi a inlan lo a nih chuan Vinicius leh Rodrygo ten mawhphurhna an lak ngam a ṭul dawn a, goal hmaah an hriam lehzual a ngai.

Group C-ah Real hian match thum khela hnehna chang vekin, point kua nen hma an hruai mek a, an hnuai chiahah hian point ruk neitu Napoli an awm. Italian club hian zanin dar 11:15-ah la chak ve lo Union Berlin an mikhual ang.