Chelsea-in season bul ṭan ṭha Spurs an sawp

Chelsea tan hlimna kawl a êng ta, Thawhṭanni zan khan Tottenham Hotspur Stadium an luhchhuah a, Ange Postecoglou hote chu 4-1 ngawtin an sawp. Spurs hian Blues an mikhual hma hian hneh loh an tawng lo a, Mauricio Pochettino hote an mikhual meuh chuan an record chhuanawm tak pawh nuai reh nghal a ni.

Spurs-in season bul an ṭan ṭhat ang bawkin inkhel pawh an ṭan ṭha. Mahse, Dejan Kulusevski hmanga an hmahruaina chu Cristian Romero chetsual avangin a rah an seng lo. Chelsea tlarhma a hriam tawk lo a, chutihrualin Spurs left back Destiny Udogie hnawhchhuah a nih avangin minute 35 ngawt player pakuain an khel. Blues hian player 10-a khel lamah Cole Palmer hmangin siphurh an sut a, an khingpui player pakuaa an khelh hnuah Jackson-a'n hattrick a siam.

Chutihrualin Chelsea goal bawh erawh a na reng a, an tlarhma player-te an hriam tawk loh bakah mahni hma an sial leh hret ṭhin. Spurs-in goal li ngawt an chhuah chungin goalkeeper Guglielmo Vicario-a'n fak a phu a, Italian keeper hi che ṭha lo se Blues-in goal tam zawk an chhuah ang.

Spurs boss Postecoglou-a'n risk a la huai a, player pakua an khelh hnuah pawh siphurh sut tumin na takin an nawr a, a tawpa goal an chhuah tam chhan pawh hi an huaisen vang a ni. Postecoglou hote hi tun season-a a vawi khat nan Premier League-ah chak lo mah se indawmkun tur an ni lo a, an khelh dan thlirin UCL khelhna hmun chang pha thei tur team an ni tho tho.

Tottenham-in point thum an hloh avangin Manchester City pakhatna an ni chhunzawm a, Chelsea erawh chak mah se match 11 aṭanga point 15 chauh an la hmuh avangin 10-naah an awm. Blues hi vawi li ngawt an chak tawh lo, chutihrualin club lian Liverpool (1-1) leh Arsenal (2-2) an chelh theih bakah Spurs an sawp.

Inkhelh banah Blues boss Pochettino chuan, "Inrintawkna neih a pawimawh a, Jackson hi a la naupan avangin club lian Chelsea tana khelh hi a harsa. Tuna hattrick a siam hian hahdamna a pek ka ring a, inrintawkna pawh a neih phah ang," tiin a sawi.

Blues-in hnehna an chan theih nan VAR a pawimawh. Poch chuan, "Coach ṭhahnem takin VAR awm an duh a, an duh loh zawnga thutlukna a kal chiah erawh chuan, 'A ni thei ni lo, mualhphona a ni, hriatthiam a har,' te an ti mai ṭhin. Chutihrualin Arteta chungchang ka sawina a ni lo," tiin inkhelh banah a sawi a, Arsenal manager leh a ṭantu tan chuan hriat a nuam lo ang.

Goal 5, Offside, Handball leh Red Card pahnih

Goal - Kulusevski : Minute rukna lekah mual vei lam aṭangin James Maddison-a'n mual laia awm Pape Matar Sarr a pe a, Spurs midfielder hian mual dinglama lo inpawt kak Dejan Kulusevski a pe. Kum 23 mi Swedish winger Kulusevski hian lalutin goal-ah a pet a; centre back-a khel ṭhin, left back atana chhawr Levi Colwill hnung a fuh hnuin goal-ah a lut.

Offside - Son Heung-min : Minute 13-naa Spurs ball inpe kual chu mawi tak a ni. Destiny Udogie ball pek chu Brennan Johnson-a'n vawi khatah cross nghalin Son Heung-min-a'n a khung. Spurs-in goal hnihin hma an hruai turah an ngai a, mah se offside vangin pawm a ni lo.

Handball - Sterling : Minute 21-naah mawi zetin Reece James-a'n ball a vawrhlut a, Raheem Sterling-a'n mual vei lam aṭangin a khalh lut a, goal a khung. Mahse, VAR hmanga ennawn a nih hnuah Sterling-a ball petin Pedro Porro-a per hnuah English forward kut hi a per a, handball vangin goal hi pawm a ni lo.

Goal pawm lo, VAR, Red Card, Penalty Goal : Chelsea an phur chhunzawm. Jackson-a ball pek latu Sterling-a ball chanlai chu Spurs defender Cristian Romero-a'n a tihpersak. Argentine defender hemi per hi petchhuah tumin a pet leh nghal a, ball pet mah se a hnampui Enzo Fernandez a pet tel. Ball per, kal zel hi Cole Palmer-a'n changin Moisés Caicedo a pe a, Brighton midfielder hlui hian goal kilah tak a pet lut. Mahse, minute 27-naa goal lut hi offside position-a awm Jackson-a'n Spurs keeper Vicario a hliah avangin pawm a ni lo.

Spurs an lawm hman a, an lawm chhung erawh a rei lo. VAR hmangin an en zet a, Romero chu Fernandez-a tihtluk vangin red card pek a ni a, penalty a chawi bawk. Minute 35-naah Palmer a rawn pen chhuak a, siphurh sutna goal a khung. Caicedo goal khung an pawm loh hi Chelsea tan malsawmna a ni ta zawk.

Red Card - Udogie : Chelsea-in Spurs an chhu let a, 3v2 a ni. Sterling-a'n ball a chang a, Jackson leh Palmer ten an thlawp. English midfielder hian a pet ṭha tawk lo a, Udogie-a'n a dansak. Hemi per hi Sterling-a'n a chang leh a, Udogie-a'n a rawn chuh nat hret avangin Chelsea forward hi a titlu. Referee-in Spurs chungah zahngaihna a lantir lo a, Udogie chu yellow card pahnihna pein a hnawt chhuak. Minute 55-naah 1-1 ni mah se Spurs chu player pakua chauhin an khel tawh.

Goal - Jackson : Chelsea-in an tamna an hmang ṭangkai a, minute 75-naah James-a'n Spurs tlarhnung awl chu hmuin Sterling-a tan through ball ṭha zet a pe lut. English forward hian ṭha taka a lakluh hnuah mahni hma sial loin Jackson-a tan a pe a, Senegal international forward hian minute minute 75-naah Chelsea hmahruaina goal a khung.

Goal - Jackson : Injury time minute linaah Chelsea-in counter attack aṭangin an khung. Conor Gallagher-a'n mual vei lam aṭangin a lalut a, hna harsa a thawh zawh hnuah Jackson-a tan pein Chelsea forward hian a goal hnihna a khung.

Goal - Hattrick : Spurs-in an tlarhnung an tichhing reng a, goalkeeper leh defender-ah hmunruak a tam. Cole Palmer-ah a awl lai takah ball a vawrhlut a, Jackson-a'n lalutin Mykhailo Mudryk-a'n a thlawp avangin keeper Vicario bum a nuam sawt. Jackson-a'n cool zeta keeper bumin hattrick siamna goal a khung.