Europe kan thlithlai dawn - Steven Gerrard

Saudi Pro League club Al-Ettifaq manager Steven Gerrard chuan thlasik transfer-ah Europe lam an hawi leh tur thu a sawi a, January-ah chuan Saudi club hoten European club-te run leh an tum dawn niin a lang.

Gerrard chuan, "Kan fan-te hnena chiang taka ka sawi duh chu, Europe-ah kan duhzawngte an awm leh awm loh kan thlithlai leh dawn. Chu chauh a ni lo - a aia pawimawh zawk mah tualchhung player pawh team tihchak nan kan thlithlai leh ang," a ti.

Kum 43 mi Gerrard hian nipui lai khan Al Ettifaq hi a zawm a, a tirah hnar zet mah se an vawi hnih dawr nawnnaah erawh a hnar zo lo. Saudi club hi a pan a, player pawh a la lut hrawl hlawm hle.

Reds-a amah thlaktu, Liverpool captain ni lai Jordan Henderson a sawm lut a, Liverpool player hlui tho Georginio Wijnaldum pawh thlem lutin, Lyon forward Moussa Dembele, Scotland centre back Jack Hendry leh Everton winger Demarai Gray te a la lut.

Mahse, Rangers boss hlui hian Saudi-ah a beisei ang result a nei hleithei lo. An league match hnuhnung pangaah vawi khat chiah hnehna a chanpui a, team 18 inelna SPL table-ah pasarihna an ni mek.

Saudi Pro League-ah hian match 12 khelh tawh niin, Al Hilal chu hmahruaitu an ni mek a, Ettifaq hian point 11 ngawtin an phak lo mek a ni - Gerrard-a'n thlasik transfer-ah European football-a player langsar zawk a thlem lut a nih pawhin a mak lo ang.