Premier League hmahruaitu an ni a, coach Mikel Arteta-a'n Europa League khel tur player a thlan danin sawi zui a hlawh. Gunners manager hian European football inelna sang pahnihna hi an ngaihthah lo tih a sawi.

North London club hian last 16 first leg-ah Sporting Lisbon chu 2-2 in an inhnehtawkpui. William Saliba-a'n chiang zetin a tauh goal a, anmahni lama Goncalo Inacio tauh luh tur chu hnai takah a en bawk.

Portuguese club lamin second half-ah Paulinho hmangin hma an hruai zui. Japanese midfielder Hidemasa Morita-a'n anmahni lama a tih luh vangin Arsenal chu khualmualah an mualpho lo hram, second leg an la hmabak.

Arteta-a'n inkhel bul ṭan turin defender Jakub Kiwior chu a thlang, defender a chhawr rim tak Gabriel a hahchawlhtir. Fabio Vieira leh Reiss Nelson te pawh a bul ṭantu zingah an tel, keeper Aaron Ramsdale aiah Matt Turner a lut bawk a ni.

Chak ni se chuan Arteta an sawisel lo ang. Mahse, goal hnih an chhuah avangin Arsenal manager tan zawhna hrang hrang chhan a ngaih phah. Arteta chuan, "Striker pali kan neih zinga pathum an khel thei lo, chuvangin a awlsam lo.

"Europa League hi kan beidawn san a ni lo a, hun awl kan neih dan a zira insiamrem erawh a ngai. Thui tak kan thleng dawn a nih chuan tun ang hun harsa hi chu kan paltlang a ngai," tiin a sawi, quarterfinal lut turin a naute a la ringtawk hle.

Goal an chhuah dan chungchang sawi zuiin Arteta chuan, "Box chhunga fimkhur a ngaihzia leh inthlahdah zeuh a pawi tih kan sawi fo, a bik takin knockout tournament-ah fimkhur a ngai zual hle. Sporting laka kan goal ven dan kha chu a ṭha tawk lo," a ti.

Brazilian defender Gabriel tel lo chuan Arsenal tlarhnung a nghet tawk lo tih a chiang, kum 25 mi defender hi tun season Premier League match 26 an khelh tawhah a inlan vek - khelh hmabak an la neih nual avangin a tha kheksak chu a ngai ve bawk.

Gunners hian Pathianni zan dar 7:30-ah Fulham an lenchilh leh nghal dawn. Portugal rama zin chau Arsenal tan tha thlah a thiang dawn lo, an neih ṭhat ber an chhawp chhuah a ngai ang - Gabriel Jesus hmel pawh kan hmu tawh mai thei.

Brazilian striker hian tun kartir aṭang khan training pangngai a zawm tawh. Khup hliam dam hlim hi an chhawr hmanhmawh loh tur thu Arteta-a'n a sawi a, tun kar tawpah a inlan a nih pawhin rei tak chu a la inkhel rih lo ang.