Messi-a'n chhuah a tum rih lo - Balague

Spanish football journalist Guillem Balague chuan, tun season tawp ruala contract hmang zo tur Lionel Messi chuan Paris Saint Germain chhuahsan tumna a nei rih lo tih a sawi a, chutihrualin Messi chelh tur chuan hnathawh tur an nei tih a sawi bawk.

Kum 35 mi Messi hian PSG tana a contract neih lai a hmang zo dawn. A kum tam deuh tawh mah se football inelna sang hmachhawn a la duh - European football khel satliah lo a, nomawi chawi theitu nih a la duh niin a lang.

PSG hi Bayern Munich hneh loin Champions League aṭangin an tla. Ligue 1 champion nih ringawt hi Messi leh PSG tan a tawk lo, chuvangin European club lian dangte el phak tur team din a ngiat tel niin an sawi.

Balague-a sawi dan chuan, Messi-a pa leh a agent ni bawk Jorge Messi leh PSG director Luis Campos te chuan a thuphungin inremna an nei tawh, ziaka dah erawh a la awm lo thung - inbiakna a la kal zel dawn.

Spanish football journalist Guillem Balague chuan, "Contract rei zawng leh hlawh chungchangah chuan a thuphunga inremna an nei tawh, lehkha a ziah chu hmabak a ni tawh mai. Mahse, thil pakhat ngaihchan mek a awm.

"Ka hmuh dan chuan, PSG hi European champion ni turin a inbuatsaih em, tih hi Messi leh a pa hian an ngaichang niin ka hria. A club hlui Newell's Old Boys lama kir tur anga sawi erawh tun nipui chu a la ni dawn lo," a ti.

Messi hian 2021 khan Barcelona a chhuahsan, Spanish club tan hian match 778 aṭangin goal 672 a khungsak. Tun hnai khan Barcelona president Joan Laporta leh Jorge Messi te an inhmu, hei hian titi a siam nghal.

Balague chuan, "Barcelona hian contract an zawrh rih lo, a club hlui lama a kir leh hi a rinawm loh," a ti. La Liga chuan Barcelona sum hman dan chungchang a khalh ngilin a rin thu a sawi bawk.

Messi awmna PSG hian zanin dar 1:30 hian Ligue 1 khel turin Brest an lenchilh ang. League match 26 aṭanga point 63 hmuin table-ah hma an hruai mek a, pahnihna Marseille aiin point riatin an sang mek a ni.