Di Maria hoin Juve an chak

Nungchang ṭha lo vangin Paul Pogba chu Juventus chuan an inkhelh tir ve lo a, an midfielder pawimawh awm lo mah se Angel di Maria an neih tho avangin buaina an nei lo.

Old Lady hian Ningani zan khan Di Maria goal khat hmangin an mikhual SC Freiburg 1-0 in an hneh. Italian club hian Europa League last 16 paltlang turin an dinhmun an siamṭha a, kawng chanve an zoa ngaih theih a ni.

Juve hian Pathianni zan dar 1:15-ah Serie A match khel turin Sampdoria an hmachhawn leh dawn. Massimiliano Allegri-a'n Pogba hi a hrem chhunzawm dawn em, tih hriat a la ni lo thung.

Italian club AS Roma pawhin Real Sociedad 2-0 in an hneh. Roma tan hian Stephan El Shaarawy leh Marash Kumbulla ten goal an khung, season hmasa Europa Conference League champion hi Mourinho enkawl an nih avangin dah hniam chi an ni lo.

Portuguese manager hian Conference League nomawi a chawipui thei a, tun hma lama an la champion ngai miah lohna Europa League pawh an beisei ngam ang. Thilmak ti thei manager an nei tlat.

Roma hian zanin dar 10:30 hian Serie A match khel turin Sassuolo an mikhual zui leh nghal ang.