Kan comeback theih ngei ka ring - Lianzuala

Bengaluru laka an tlawm hlimin Mumbai City forward Lallianzuala Chhangte chuan, "Pathian zarah kan comeback theih ngei ka ring," tiin Vanglaini a hrilh a, Indian Super League final-ah a team hruai thlen ngei a tum.

ISL semifinal first leg-ah Bengaluru chuan 1-0 in Mumbai hi khualmualah an hneh a, Pathianni zan dar 7:30-ah Mumbai City hi second leg khel turin an mikhual dawn - Mumbai vanneihna chu away goal rule hman a ni lo hi a ni a, hetihrual hian ISL semifinal first leg-a chak zinga 73% chuan final an lut tih hriat a ṭha.

Mumbai-ah hian Lallianzuala bakah Lalengmawia Ralte (Apuia) leh PC Rohlupuia te an awm a, Bengaluru-in Mizo player kawl an nei lo thung. Lianzuala chuan, "Mizo mipuite min lo ṭawngṭaipui turin ka sawm a ni," a ti a, Mizo telna club-in final an luh theih nan i ṭawngṭaipuina an ngen e.

Beiseina nen

Bengaluru-in an theihna an hrechiang a, first leg-ah pawh âtthlak taka Mumbai nawr chiam ai chuan tlarhnung lam ven an thlang a, counter attack-ah innghatin an tihfuhzia erawh kan hmu - Pathianni zanah an khelh dan an thlak thut dawn lo.

Lianzuala chuan, "Tlarhnung ven ngaipawimawh team an nih avangin kan dawhtheih a ngai dawn a, kan chance neihte kan chhawr thiam a ṭul bawk ang," tiin Vanglaini a hrilh a, first leg-a an finishing fuh tawk lo a la hre reng.

Tun season ISL-a goal 10 leh assist vawi ruk neitu Lianzuala chuan, "Kan tihdik loh lai leh siam ṭhat ngai laite kan en let a, chumi tidik tur chuan kan khel ang. Team boruak a ṭha a, beiseina pawh a la sang khawp mai," tiin Vanglaini a hrilh.

A harsa dawn

Mumbai-in league match 20-ah vawi 14 hnehna an chang a, vawi hnih tlawm an neih chu league hmahruaitu an ni tih a chian tawh hnua mi a ni - he team hian league round-ah goal 54 zet an khung a, anni aia khung tam an awm lo. Sri Kanteerava-ah goal khung mamawh chunga BFC an nawr tur hi hmuh a châkawm tawh hle.

Mumbai tan wing-ah Lianzuala leh Bipin Singh awmin, goal 11 leh assist vawi ruk neitu Jorge Diaz chu tlarhmaah a mal tlat ang a, a hnung chiahah goal sarih leh assist vawi sarih neitu Greg Stewart chuan a lo thlawp ang.

Midfield-ah Apuia leh Ahmed Jahouh an pawimawh leh dawn a, tlarhnungah captain Mourtada Fall hoin left back Vignesh Dakshinamurthy, right back Rahul Bheke, centre back Mehtab Singh leh keeper Phurba Lachenpa ten an theihna tak tak an pholan a ṭul.

BFC beiseina

Bengaluru-in season bul ṭan ṭha lo mah se league match riat zet a zawna an chak hnuah playoff an inpetkai a, knockout match-ah Kerala Blasters hneh zuiin, semifinal first leg-ah Mumbai an hneh leh a, an inrintawk vanglai tak a ni.

South Indian club-in harhtharna an chan theih nan tlarhnung player an pawimawh a, keeper ṭha mi Gurpreet Singh Sandhu hoin Aleksandar Jovanovic, Prabir Das, Sandesh Jhingan leh Naorem Roshan te an ṭangkai leh dawn.

Midfield-ah Javier Hernandez leh Suresh Wangjam an pawimawh ṭhin a, Sunil Chhetri-a'n tun season-ah bul ṭan tlem mah se boruak sanga a ṭangkaizia chu playoff aṭangin hmuh tirin kan awm - he team hian Roy Krishna an la nei bawk tih hriat tel a ṭha.