Indian Wells lamah Wawrinka a chak

Grand Slam vawi thum champion tawh Stan Wawrinka chuan kum li hnuah BNP Paribas Open a khel ve leh ta, a match hmasa berah Aleksandar Vukic 6-4, 1-6, 6-1 a hnehin second round a inhlangkai.

Wawrinka hi a vanglai chuan player ṭha berte zinga mi a ni ṭhin, world number 3 hial pawh a ni phak. Mahse, khup leh kephah hliam vangin a buai ngun a, a thlen san tur angin a thleng sang tawk lo niin a lang.

Kum 37 mi ni tawh mah se tennis a la chawlhsan mai bik lo, world number 100 a nih avangin tournament a khelh tur hoah hian wildcard a hmu a nih loh chuan qualifier aṭangin a khelh a ngai ṭhin, player ṭha dang aiin a hah bik a ngai tihna a ni.

Swiss star hian a match lehpekah chuan Miomir Kecmanovic a hmachhawn ang, seeded 26-na a chan phak avangin Kecmanovic hi first round-ah a inkhel ve lo - Pathiannia an inkhel tur hi a hmuhnawm ang.

Inkhel dangah Andy Murray chuan darkar thum leh minute 12 chhungin Tomas Etcheverry chu 6-7 (5-7), 6-1, 6-4 in a hneh, tun season chhungin Murray hian vawi sarih ngawt deciding set a khel tawh.

World number 1 hlui Murray chuan, "Dinhmun ṭha leh duhawm takah ka ding rengah ka inngai a, mahse thutlukna siam sual ka neih zauh zauh avangin a tawpah ka buai, ka tlang hram erawh ka vannei hle," tiin a sawi.