Thlanga pual exhibition match a hlawhtling

Nimin khan RG Stadium-ah Mizo football coach langsar H. Vanlalthlanga pualin exhibition match khelh a ni a, Thlanga enkawl tawh player hranghlui aṭanga active player pungkhawm chu 100 chuang an ni.

Mizo professional footballer hmasa ber S. Malsawmtluanga chuan an pahnih lan dunna thlalak pein, "To me, you are the best," tih a chuang. Mama'n 'Ka tan chuan i ṭha ber' ti hialin amah zirtirtu coach a chawimawi a, hei hian Mizoram tana Thlanga hnathawh thui tak a sawi a ni.

Thlanga chuan, "Ka phu loh chawimawina ka dawng a, ka lawm takzet a ni. Player-te hi coach pakhat chher theih a ni lo a, coach pakhat aia tam an awm hnuah an nih tur ang an ni ṭhin. Ka kum lo upat deuh avangin a hming ṭhatna ka tum mai zawk a ni. Ka nau Sanga leh Zara te thawhrah hi ka seng a, an pahnih hian ka chhuang em em a ni," tiin Vanglaini a hrilh.

Mizoram football hranghlui, Chanmari FC leh Mizoram Santosh Trophy champion team bakah Subroto batch hrang hrangin Thlanga hi chawimawina an hlan. Exhibition match hrang hrang khelh a ni a, match pui berah hian Thlanga enkawl tawh player-te chu team hnih coach Lalsangzuala Hmar leh coach HC Zarzoliana team-ah ṭhenin an inkhel a ni.