Man United an insiamṭha nghal

Anfield-ah Man-chester United an mualpho a, Liverpool lakah goal sarih ngawt an chhuah. Kar khat pawh a ral hmain Erik Ten Hag-a hote an insiamṭha nghal a, Ningani zan khan Europa League last 16-ah Real Betis 4-1 in an sawp.

Man United hian March 12, Pathianni zan dar 7:30 hian Old Trafford-ah Southampton an mikhual dawn a, an harhtharna chan hi 'hartharna dik' a ni reng em, tih chu a chiang ang.

An nui leh ta

FIFA World Cup zawh hnua khel ṭha chungchuang Marcus Rashford-a'n Anfield-ah goal khung hna chawlhsan zawk mah se Old Trafford-ah goal khung a chhunzawm lehnghal. English forward hian minute rukna lekah goal a khung a, Ayoze Perez-a'n Real Betis tan minute 32-naah siphurh a sut.

First half-ah Man United khel ṭha zawk mah se 1-1 in a tawp a, second half-ah erawh mualneituin an ṭha zawk tih an pholang. Antony-a'n sawisel a hlawh a, a man aṭanga teh phei chuan a awm hle. Mahse, Brazilian forward hian Barcelona laka goal pawimawh a khung hnuah Betis lakah hmahruaina goal a khung.

Anfield-a sawisel hlawh Bruno Fernandes chu khelmuala che ṭha ber a ni a, minute 58-naah goal a khung. Wout Weghorst pawhin Old Trafford-a a goal hmasa ber a khung a, Bruno che ṭha leh Weghorst-a goal khung hi United tan lawmna tur a ni.

Engtin zel?

Man United legend ṭhenkhatin Bruno chu captain armband hreng tlak loah ngai mah se Old Trafford-a inkhel entute chu 'Bruno, Bruno...' tiin an au rual - captain atan an la pawm.

Hun tawp lamah Facundo Pellistri a rawn lut a, hmabak êng tak a nei tih a pholang. Pellistri hi Qatar World Cup-ah khan Uruguay match thumah a inlan vek. Chutihrualin United tan erawh vawi nga chauh a la inlan a, bench aṭang vekin a lut.

Weghorst goal luh theih nan Pellistri a inrawlh a, kum 21 mi Uruguayan winger hian khelhna hun tam zawk a neih theih a rinawm. Ten Hag-a'n squad chhah ṭha tak a nei a, Pathianni zana Saints a hmachhawn hunah a siksawi hret ang.