Bagan leh Hyderabad an inhnehtawk

Zirtawpni zan ISL semifinal inkhelah Hyderabad leh ATK Mohun Bagan te 0-0 in an inhnehtawk a, team pahnih hian March 13, Thawhṭanni zanah semifinal second leg an khel ang.

Bagan tana inkhel bul ṭantu K. Lalṭhathanga (Puitea) chuan, "Tun hnaiah kan khel zawn deuh a, khualmuala inkhel kan ni bawk. Hei vang hian kan chau tlang deuh a, kan tan chuan result chhia a ni lo - team pahnihin kan chance neih chhawr kan harsat ve ve a ni," tiin Vanglaini a hrilh.

Puitea chuan second leg an khelh tur thlirlawkin, "A kar lakah ni hnih chiah hun awl kan nei dawn a, mahse, mahni muala inkhel tur kan nih avangin beiseina kan nei a, chak ngei pawh kan tum," a ti a, hetihrual hian team pahnih tan kawng a la inhawn ve ve thu a sawi bawk.

Bagan tan Puitea hian minute 66 chhung khelmualah hun hmangin, Lalrinliana Hnamte (Terina) chuan a thlak a, Hyderabad-in an squad-ah Mizo player an dah lo thung.