Zarkawt BCA an chak lo!

Mizoram Super League champion lai Zarkawt BCA chu tun season chhunga a vawi khat nan an tlawm. Niangani zan inkhelah Bungkawn LB Associates chuan BCA hi 111-102 in an hneh a ni.

R. Dengṭhuama Indoor Stadium, Mualpuia inkhelah BCA hian an player ṭha pangngai panga tho bul an ṭantir, mahse quarter hmasa berah Bungkawn lamin 36-23 in hma an hruai fal nghal.

Quarter hmasa pahnihah LB an chungnung a, second half lamah hniam zawk mah se an chungnunna an hum tluan thei. Bungkawn hian hma an hruia fal lai ber phei chuan point 23 ngawta san zawk lai an nei hial.

Palinaah Bungkawn hian an dinhmun an sawhnghet a, an hmabakah Khatla TBL leh Tuikual South an la hmachhawn dawn. A sang pali zinga awm tlang tur chuan an match hnuhnung bera TKS an tum hunah chetsual loh a pawimawh dawn a ni.

Ningani zan inkhel dangah Khatla TBL chuan Mission Veng Hotshots chu 97-76 in an hneh. TBL tan Vanlalrinchhana leh Michael Liansanga ten point 20 ve ve an nei a, point 19 neitu Vanlalṭhazuala a hmuhnawm bawk - tualchhung player an chhawr ṭangkai thei hle.

Zarkawt BCA leh Khatla TBL ten semifinal an lut chiang tawh, pathumna Hotshots pawh an dinhmun a ṭha. Bungkawn, Tuikual South leh Chanmari Vikings ten hmunruak pakhat an inchuh, an tan match zawng zawng a pawimawh vek.