Theihtawp kan chhuah zel ang - Klopp

Manchester United laka 7-0 a chak hlim Jurgen Klopp chuan theihtawp an chhuah chhunzawm zel tur thu a sawi a, German coach chuan, "Game ṭha tak khelh tluka intihphurhna ṭha a awm chuang lo a, kei pawhin chu chu ka hrethiam.

"Premier League-ah match nga zet chu a zawnin kan khel ṭha tawh - inrintawkna chungchang kan sawi fo a, dimdawi taka enkawl ngai pangpar ang a ni a, chhe mai lo tura kan vawn reng a ṭul a ni.

"Hun neih zawng zawng aṭangin goal a khung theih kher lo ang. Mahse, chu chu kan tum tur a ni a, kan hun ṭha neih chhawr zel a pawimawh - United lakah pawh goal kan khung reng reng khan, pet nghal kher lo pawhin duhthlan tur kan nei thei zel a ni.

"Khatiang tak khan tih zel kan tum dawn. Khelh tur a la tam em em a, tupawh hi kan elpui vek an ni a, chutiang tak chuan kan khel zel ang," a ti.

Liverpool hian zanin dar 6:00-ah Bournemouth an lenchilh dawn a, season ṭantir khan Anfield-ah 9-0 in Cherries hi an lo sawp tawh.