German League-in khauh an tum

German Football League (DFL) chuan sumdawngten club-a share tam zawk an neih lohna turin, 50+1 dan an neih chu khauh zawka kalpui an duh a, he dan hnuaia hriatthiam bik club-te pawh dan khauh zawk hnuaia awmtir an duh.

European ram dang ang lo takin German Football League (DFL)-ah hian 50+1 rule hman a ni a, he dan hnuaiah hian sumdawng lian emaw mimal hausa takten German club-ah 49% aia tam share an neih a thiang lo a, a bak hi fan-te ta niin, mi pakhat duh dana club kal tur chu hei hian thui takin a veng a ni.

Mahse, German club zingah hian VfL Wolfsburg, Hoffenheim leh Bayer Leverkusen te chu 50+1 danah hian ngaihhnathiam an ni - Leverkusen leh Wolfsburg te hriatthiam an nih chhan hi club neituten kum 20 chuang club an lo enkawl tawh vang a ni.

Lammuala inkhel tawh Hoffenheim hriatthiam an nih chhan hi club-a share ngah ber Dietmar Hopp-a'n an grassroot football-a sum a sen nasat avang te, Germany-a professional leh amateur football-a a insen nasat vangte a ni.

Mahse, heng hriatthiamna hnuaia awm club-te pawh hi DFL chuan hriatthiam reng bik a fuh tawh loin an hria a, 50+1 dan chu club zawng zawngah hman an tum.

DFL chuan thuchhuah siamin, "Bundeskartellamt hnenah kan ruahmannate thehluh tawh a ni a, kan ruahmanna thehluh tam tak zingah 50+1 dan hnuaia hriatthiam bik neih tawh loh a tel," an ti a, Bundeskartellamt hi Germany-a national competition regulatory agency an ni.

Kar hmasa lawk khan Hoffenheim neitu Hopp chuan 50+1 dan hnuaiah hriatthiam reng an ngaih bik loh tur thu a lo sawi tawh a, a voting rights tam zawk chu zângnadawmna phut miah loin club-ah a pek kir tur thu a sawi.

German football-a 50+1 dan hi fan-ten an club ṭan em em tana ngaihdan an thawh ve theih nana tih a ni a, club hnuaia member associations te chuan not-for-profit organisations kaltlangin club kalphungah aw an nei ve a ni.