Real tan insiamṭhat a hun e!

Spanish La Liga-a an match hnuhnung pahnih aṭangin Real Madrid-in point hnih chiah an hlawh chhuak a, inelna hrang hranga an match hnuhnung paliah vawi khat chiah an chak.

Real hian La Liga hmahruaitu Barcelona chu point kuain an phak lo mek a, match 24 ve ve an khel tawh - Carlo Ancelotti nauten an champion nomawi humhim an duh chuan chetsual a thiang tawh lo a, zanin aṭanga bul an ṭan a ṭul.

Madrid khaw club hian zanin dar 6:30-ah Espanyol an mikhual dawn a, an chak zo lo leh a nih ngat chuan Pathianni zana inlan tur Barcelona tihphur nan a ṭangkai khawp ang!

Barca hian Pathianni zan dar 1:30-ah Athletic Bilbao an lenchilh dawn a, Atletico Madrid erawh Thawhṭanni zanah an inlan dawn chauh a, zan dar 1:30-ah Girona an lenchilh dawn a ni.

Benzema bawk chu

Real-in insiamṭhat an mamawh vanglai takin hliam vanga inlan thei lo tur player an nei a, striker chhuanvawr Karim Benzema chuan kerek hliam vangin club training a zawm thei lo.

Benzema hi tun season-ah hliam vangin a talbuai ngun hle - Real-in tun season inelna hrang hranga match 40 an khelh tawh aṭangin match 27 chiah a la khel a, goal 18 ngawt a khung tawh thung.

French striker tel loin Real tlarhma a hriam tawk ṭhin lo tih chu thil langsar a ni a, tun season-ah pawh hliam vanga league match 15 chauh a khel chungin ani aia La Liga-a Real tana goal khung hnem an awm rih lo - goal 11 a khung tawh.

Hei hian Real-in Benzema an mamawhzia a pholang a, mahse, zaninah a inlan thei dawn tlat lo - Nilaini zanah Champions League last 16 second leg khel tura Liverpool an mikhual zui dawn avangin Benzema dinhmun hian Real a tihlauthawng hle ang.

Engtinnge?

Real boss Ancelotti-a'n Benzema a chhawr theih loh ngun em avangin a captain tel loa khelh dan nghet sa a nei tawh hial a, zaninah pawh Vinicius Junior, Rodrygo leh Marco Asensio te chu tlarhmaa inkawp tura beisei an ni.

Rodrygo hi false nine anga hman ṭhin a ni a, kum 18 mi Alvaro Rodriguez chuan February khan Real tana a match hmasa ber khelin ani pawh hian Ancelotti rinna a hlawh chho mek.

Hliam vang thoin defender pawimawh David Alaba chu la inlan thei lo tura a ni a, Ferland Mendy chuan training zawm tawh mah se inlan nan chuan a la hma hret mai thei.

Hetihlai hian defender Antonio Rudiger chu hliam tenau a nei bawk a, Chelsea defender hlui hi Liverpool thlir ran chunga hahdamtir a nih pawhin a mak lo ang.

An kim bik lo

Real result hre sain, Pathianni zanah Barcelona an inlan dawn a, Athletic Bilbao khelmuala leng tur Catalan club hi an duh dan tak erawhin an inrem thei dawn bik lo - Bilbao tan chauh ni lo, Real tan chanchin lawmawm a tling.

Barca tan midfielder pawimawh Pedri-a'n dam lam a la pan thei lo a, Europa League knockout playoff first leg-a Manchester United laka inhliam midfielder hi Bilbao-ah a zin ve dawn lo.

Valencia laka hnawhchhuah tawk Ronald Araujo chu San Mames-ah a inlan thei dawn lo bawk a, Uruguayan centre back hmun ruak hi Jules Kounde emaw Marcos Alonso emawin luahin, Andreas Christensen an dinpui ang.

Barca tan winger Ousmane Dembele pawh a la inlan thei dawn lo a, hetihlaia chanchin lawmawm erawh Robert Lewandowski a dam tawh chu a ni.

Hei le Lewy

Barca striker chhuanvawr Lewy hi 1-0 a rin loh taka Almeria an hneh loh ṭumin a inhliam a, Polish striker awm loh hlanin Copa del Rey semifinal first leg-ah Real Madrid chu 1-0 in an hneh a, league-ah Valencia chu 1-0 in an hneh bawk.

Lewy hi United leh Almeria laka an tlawm ṭumin a inlan ve ve a, a team tan danglamna a thlen thei lo. Hei vang hian sawisel a hlawh ṭan a, mahse, tun season-a match 31 a khelh tawh aṭanga goal 25 khungtu hi sawisel ngawt theih a ni lo.

Polish striker erawh a inngaitlawm a, a goal khung tam chhan chu tlarhnung lam a nih thu a sawi - Barca hian tun season-a league match 24 an khelhah goal riat chiah an la chhuah.

Lewy chuan, "Striker tan chuan kan tlarhnung ang neih hi a ṭha - tlarhnungah a him dawn tih hriain, huai takin risk kan lak theih phah a ni," a ti a, team hlawhtling ni tura pawimawh hmasa ber chu defense a nih thu a sawi bawk.

Thawnthu hlui

Barca hian tun hnaiah result an nei ṭha tawk lo tia sawiselna a awm. Mahse, Lewy chuan, "Football ṭha tak khelh hi Barca thisena bet tlat a ni tawh a, mahse, football hi a inthlak danglam ve reng tih kan hriat tel a ṭul.

"Entirnan, kum 10 liam taa Barca khelh dan kha tunah a ṭha reng tawh lo mai thei. Kan player neih dan a zir leh kan dinhmun mek thlir a, insiamṭhat dan zawn a ngai a ni," a ti - Bilbao zawhah hian La Liga-a an match khelh leh hmasak ber tur chu Real lakah a ni a, March 19 zanah an mikhual dawn.

Pathianni zana Barca hmachhawn tur Athletic Bilbao hi Catalan club coach hlui Ernesto Valverde a enkawl a ni a, January 2020 khan league-ah hma an hruai mek chungin ban a ni - Barca hi league-ah vawi hnih a champion pui hman.

Valverde hian a team hlui lakah hnehna chan a châk ang tih a chiang a, mahse, kum 59 mi coach hoin Bilbao hi inelna hrang hranga an match hnuhnung paliah chak an nei lo - vawi khat draw neiin, vawi thum an tlawm a, Barca lakah insiamṭhat an tum ang.