Formula 1 intlansiaka hmuhnawm awm thei tur zawng zawng chhawpchhuah a ni a, tawnhriat nei ṭha leh driver huaisen Lewis Hamilton-a'n Saudi Arabian Grand Prix-ah hnehna a chang.
Hremna hmachhawn mah se Max Verstappen chuan pahnihna dinhmun a la luah phak tho. Red Bull driver leh Mercedes car khalhtute hian point 369.5 ve ve an hmu. December 12 zanah Abu Dhabi GP tlan tur niin champion tur an chingfel nghal dawn.
Season kal laiah intlansiak 21 an nei tawh, champion lai Hamilton leh a elpui Verstappen te point hmuh zat a inang. Dutch tlangval Max hian vawi kua hnehna chang tawhin a chak tam zawk - Britain star hi vawi riat a chak ve tawh thung.
Boruak a nung
A vawi khat nan Saudi Arabian Grand Prix tlan a ni a, champion tuma inelna boruak san vanglai a nih avangin qualifying aṭangin boruak a nung nghal hle. Mercedes driver Hamilton-a'n a hmasa ber (pole) a chang.
Red Bull driver Verstappen-a'n pathumna dinhmun aṭanga bul a ṭan a ngai, tlan chhinnaah a car gearbox a ti chiang lo deuh. Gearbox hi an thlak a nih chuan intlansiaka a bul ṭanna tih hnun a ngai dawn, thlak loin 'risk' an lakpui.
A hmasa pahnihah Hamilton leh Valtteri Bottas te an awm avangin Max-a tan thil a awlsam dawn lo tih a chiang. Bottas hian a theih chen chen chu a teammate Lewis chak theih nan a beihpui ang tih pawh rin thiam theih nghal a ni bawk.
A hmuhnawm
Lap 10-naa Mick Schumacher chesualin safety car a luh a ngai, hetih laia hmahruaitu Hamilton leh Bottas te chuan an car ke (tyre) an thlak a, an hnunga awm Verstappen rawn dawk chhuakin - Hamilton leh Bottas ten an zui thung.
Chetsualna a thlen avangin 'Red Flag' zar a ni a, hetih lai hian intlan pelh phal a ni lo. An chhuahna hmun aṭangin an tlan ṭan ṭha leh, bul an ṭan ṭhat lehna kawng kawi hmasa berah Hamilton chu Verstappen aiin a tlan chak zawk.
Mahse, Verstappen hian kawng sir dai deuh chungin a tlan pel nawn leh sak. Lewis chu kawng sir lamah nek chhuakin an inkarah Alpine driver Esteban Ocon a rawn tlazep, an inkara driver awm chu team dang a nih avangin Red Bull tan lawmna tur a ni.
A la tawp lo
A hmasa lam chauh pawh an ni lo, a lai leh hnung lam thlengin inelna a nung ṭha hle. Haas driver Nikita Mazepin leh George Russell an inti palh; Red Bull driver Sergio Perez leh Ferrari car khalhtu Charles Leclerc te an in bakkaih bawk.
Hamilton leh Verstappen ten an inkara awm Ocon hmangthiam zawk nih tumin an inbei tawn zak zak. Lap 42-naah Verstappen-a'n a car brake thutin Hamilton-a car-in a sut phah a, Dutch driver hi 5 second penalty a hmu.
Max-a'n hma hruai chhunzawm mah se, lap ruk an tlan leh hnuah Hamilton chuan rawn tlan pelin a chesual duh tawh lo. A elpui car a tai palh vangin second 10 hremna hmu bawk mah se Verstappen chu pahnihna a ni tlang, two point penalty erawh belhkhawm chi a nih avangin kuminah a pawi phak tawh lo ang.
Hun rei tak chhung chu intlansiak hi ka lo hmachhawn ve tawh, tun ṭuma mi hi a hautak ber a ni ang. Ka theihna leh thiamna bakah tawnhriat hmangin chetsual loh ka tum ngar ngar, ka chak theih nana min puitu zawng zawng chungah ka lawm. - Lewis Hamilton, Mercedes
Thil thleng tam tak a awm, ṭhenkhat chu ka tana pawm harsa ni mah se intlansiakin a ken tel an ni. Theihtawp chhuahin ka bei a, pakhatna nih duh mah ila pahnihna nih hi a chhe loah ka ngai.
- Max Verstappen, Red Bull
