Khaw vawta inkhelh harsat Messi

Lionel Messi-a'n Paris Saint-Germain a zawm hnuah beisei a la phak chiah lo, khel ṭha pangngai viau mah se Barcelona tana Messi ang khan PSG tan a la ni thei lo; a khelh ṭhat tawk loh chhan an inrinsiak mek.

Argentina international hian PSG tan Ligue 1-ah goal khat chauh a la khung. Champions League lamah erawh goal thum a khung tawh thung, season chanve pawh a la nih loh avangin insiamṭhatna hun erawh a la tam.

Barcelona tana Messi khelhpui ṭhin Luis Suarez chuan, "Leo nen hian nitin deuh thaw kan la inbia, kan khelh dan phung bakah chhungkua leh nun dan te kan sawi dun ṭhin. Paris khawpui chu vawt a tih thu min hrilh.

"Vur a tla nasa a, vur sur hnuaia inkhelh chu harsa a ti tih pawh ka hre mai, khaw vawt tak hnuaia inkhelh dan a zir thiam a ngai," tiin a teammate hlui leh a ṭhian ṭha ni bawk chanchin a sawi.

Mauricio Pochettino enkawl PSG hian zanin dar 11:15 hian Champions League group match khel turin Club Brugge an mikhual ang, Paris club hi tling chiang tawh ni mah se, anmahni khelmuala khel tur an nih avangin player ṭha an inlan thei ang.

Group A inkhel dangah hmahruaitu Manchester City chuan RB Leipzig an lenchilh ve thung ang. Pep Guardiola naute hi group hmahruaitu an ni chiang tawh a, khualmuala zin chhuak tur an nih bawk avangin an indah ṭhat a rinawm.