Ragnick-a enkawl Man United an danglam

Manchester United chuan manager thar Ralf Rangnick hnuaia an match hmasa berah Crystal Palace 1-0 in an hneh a, Pathianni zan inkhela goal awmchhun hi minute 77-naa Fred-a khung a ni.

Brazilian midfielder Fred hian sawisel hlawh ṭhin mah se manager rin a hlawh a, Ole Gunnar Solskjaer hnua team enkawl lailawktu Michael Carrick bakah manager thar Rangnick thlengin hmun pawimawh an chantir.

Eagles lakah hian Man United-in point thum hlawh chhuak lo thei dinhmuna an din laiin Fred a rawn lang a, Brazilian midfielder hian Mason Greenwood hnen aṭanga a ball hmuh chu vawi khatah pet nghalin mawi zetin goal kilah a pet lut.

Ragnick hian khelh dan phung nghet a nei a, gengenpressing a larpui. Hemi a nih avang hian kum 36 mi Cristiano Ronaldo tan hmun awm lo turin sawi thawm awm mah se German manager hian Michael Carrick hnuaia Arsenal hnehtute bawk bul a ṭantir.

Man United-in manager thar hnuaiah training mumal an nei lo chungin ṭan phat aṭangin pressure ṭha tak an pe. Solskjaer hnuaia tlanna tur hre lo player-te khan an tih tur ṭheuh an hria a, Palace player-ten an goal lama in pass pawh an harsat.

Ragnick hnuaiah hmasawnna a awm tih hmuh hmaih rual a ni lo a, statistics-in a dikna a pholang. Season liam ta Europa League quarterfinal hnua Old Trafford-a goal an chhuah lohna hmasa ber a ni a, ni 234 zet an nghak.

Final third-ah vawi 77 an in pass a, tun season-a an in pass hnem ber a ni. An khingpuite lam (final third) ah vawi 12 ball an chhuhlet a, Sir Alex Ferguson chawlh hnua Premier League-a an record ṭhat ber ṭum a ni.

Man United hian an khingpuite box chhunga ball an khawih hnem ber ṭum an tawng a, an in pass hnem ber ṭum a ni bawk. Minute 30 chhungin vawi 10 shot an nei a, Watford laka an tlawm ṭuma inkhel pumpuia an shot zat aiin a tam zawk.

Chutihrualin Sir Alex hnua manager David Moyes, Jose Mourinho leh Solskjaer ten an match hmasa berah hnehna an chang vek a, Louis van Gaal chiahin match hmasa berah chak hmel a hmu lo.

Rangnick hian chance insiam hnem mah se chance ṭha bik an insiam theih loh avangin chak turin vanneihna an mamawh a, an mamawh tak chu Fred hmangin an hmu bawk.

Inkhelh banah Man United manager Rangnick chuan, "Ka naute khelh danah ka hlim hle. A bik takin inkhelh ṭantirh minute 30 chhung kan khelh dan kha a ṭha chungchuang a ni. Hmasawnna tur chu a awm ngei mai. Chutihrualin training session vawi khat chauh kan nei chunga khatianga ṭha an khelh dan khan min tilawm. Ka beisei aiin an ṭha," tiin a naute a fak.

Man United hian December 8, Nilaini zan hian Young Boys an hmachhawn dawn a, English club hian Champions League knockout stage an thlen tawh avangin German manager-in player enchhin nan a hmang thei ang.