Medvedev hoin Russia an champion

Daniil Medvedev telna Russian Tennis Federation chuan Croatia 2-0 a hnehin Davis Cup title an la. Russia hi ram leh ram mipa tennis team hmanga inelnaah vawi thum an champion-na a ni.

Pathianni zana final inkhelah singles match khelh hmasak a ni, match hmasa berah hian Andrey Rublev chuan Borna Gojo chu 6-4, 7-6 (7-5) in a hneh a, 2018 champion Croatia lakah Russia chu dinhmun duhawm takah an ding.

Singles match hnihnaah Russia tan world number 2 Medvedev a rawn ding chhuak, a hmachhawn tur chu US Open pawh champion tawh Marin Cilic a ni. Hard court-a inkhel thiam pahnih intawngah Medvedev 7-6 (9-7), 6-2 in a chak.

Kum 25 mi Medvedev chuan, "Ka tan chuan hetiang baka thil lawmawm dang hi a awm thei tawh chuang lo ang, tun hnai kar hnih chhung chu ka tennis zinkawnga hun nuam leh hlimawm bik a ni," tiin a sawi.

Medvedev hian Grand Slam nomawi hmasa ber ni turin US Open title a la. ATP Finals-ah khan Alexander Zverev hneh lo mah se, tunah chuan inelna ngaihhlut Davis Cup-ah an ram tan sulhnu ṭha a hnutchhiah leh ta.