Porto, Atletico & Milan tan beiseina Atletico dinhmun a derthawng
Champions League-a group of death tia an chhal group B-ah FC Porto, Atletico Madrid leh AC Milan ten match khat ṭheuh khelh tur an la nei vek a, last 16 luh beiseina an la nei vek!
Liverpool-in group of death-ah an awm tih an inhre ve lo a, Jurgen Klopp-a enkawl team hian match nga an khelh tawhah hnehna an chan vek avangin last 16 an lut chiang tawh.
Hetihlai hian an elpui team dang pathum erawh an dinhmun a la chiang lo vek - Porto-in zanin dar 1:30-ah Atletico an mikhual dawn a, tlang turin chak an mamawh ve ve.
Zanin dar 1:30-ah vek AC Milan-in Liverpool an mikhual dawn a, Liverpool tana inkhekl awmze nei tawh lo hi Italian club tan erawh thih leh dam kar hriltu a ni.
Porto vs Atletico
Spanish champion Atletico-in season duhawm ber an hmang lo. La Liga-a an match hnuhnung berah Real Mallorca chu 2-1 in an ngam lo a, hmahruaitu Real Madrid chu match khata khel tlemin point 10-in an phak lo mek.
Champions League-ah pawh table mawngphah luahtu an ni a, last 16 lut tura hmabak ko ber an ni - Porto an hneh ngei ngei a ngai a, Liverpool-in hna an thawhsak a ngai tel bawk.
Atletico an chak a, Reds-in Milan an hneh bawk chuan Madrid khaw club hi last 16 an lut chiang dawn a, chak an inbeisei piah lamah Liverpool-in hna an thawhsak an beisei a ngai dawn tihna a ni!
Diego Simeone-a'n Mallorca lakah Luis Suarez leh Joao Felix chu bench-ah a dah a, hneh tura a ngaih team lakah an tlawm zui - hei vang hian zaninah Suarez leh Felix ten an pu thutlukna siam thup mawi sak an tum ang.
A har a ni
Lehkhaa en mai chuan Atletico hi team ṭha zawk an ni. Mahse, tun hnaiah beisei ang result an nei thei lo a, player chhawr theih loh an nei dawn nual bawk.
Centre back Felipe chu hrem vangin a inlan thei dawn lo a, Mallorca lakah hliam vangin Stefan Savic lakchhuah a ni a, Jose Gimenez a la dam chiang lo bawk - a laiah phuahchawpin Geoffrey Kondogbia leh Mario Hermoso an inkawp a ngai mai thei!
Porto hian tlarhmaah tun season-a match 20 a khelh aṭanga goal 13 khung tawh Luis Diaz leh match 20-a goal kua leh assist pasarih neitu Mehdi Taremi an nei a, Atletico tlarhnung phuahchawp pal darh tur khawpin an ṭha tawk.
Portuguese club hi league-ah pawh an che ṭha rih viau - match 13 khelh aṭanga la tlawm loin hma an hruai mek a, zaninah pawh Liverpool-in Milan an hneh chuan draw result ringawt pawhin an tlang ang.
Milan beiseina
AC Milan-in November kartawp bera Atletico Madrid an hmachhawn hma khan point khat chiah an la nei - mahse, rin loh takin Atletico an hneh a, Liverpool-in Porto an lo hneh bawk avangin beiseina an nei thar ve leh ta.
Milan striker Zlatan Ibrahimovic chuan, "Match pawimawh tak a ni a, a pawimawh berah chuan kan theihtawp kan chhuah phawt a ni," tiin a sawi a, kum 40 mi striker hian tun season-ah match 12 khela goal ruk khungin assist vawi hnih a nei leh der tawh.
Mahse, Liverpool nena thawnthu ngaihnawm tak lo nei tawh Milan hian Olivier Giroud, Samu Castillejo, Ante Rebic, Pietro Pellegri, Davide Calabria leh Simon Kjaer te chu hliam vangin an chhawr thei dawn lo a, an ṭhat dan berin Reds an mikhual dawn lo.
Chutihruala hriat tur chu Liverpool-in an ṭhat dan berin an khel dawn lo tih hi a ni a, group B team ṭha ber tum tur angin lang mah se last 16 lut chiang tawh tum hi Milan vanneihna a ni - mahse, lut tura beisei Ibrahima Konate, Kostas Tsimikas, Neco Williams leh Takumi Minamino te hi Mohamed Salah leh Virgil van Dijk ten an rawn ho erawh a rinawm a, inkhelh awlsam chu a ni lo ang.
Tu nge tlang dawn?
• Liverpool-in match nga an khelh tawhah hnehna an chan vek avangin hmahruaitu nichungin an tlang chiang tawh.
• Porto-in point nga an neih mek avangin zanina Atletico Madrid an hneh chuan an tlang dawn a, match lehlama result-in a nghawng buai lo ang.
• Atletico tan tlang tur chuan Porto hneh ngei ngei a ngai a, hei bakah hian Liverpool leh Milan inhnehtawk emaw Milan an tlawm a ngai tel bawk.
• Milan tan tlang turin chak a ngai a, Porto leh Aletico inhnehtawk a ṭul bawk.
• AC Milan leh Atletico hi match tawp berah chak ve ve ta se, head-to-head ah an intluk tawk avangin goal difference en tur a ni dawn.
• Team pahnihin goal sarih ve ve an chhuah tawh a, Milan-in goal nga khunga Atletico-in goal li an khung avangin goal khata khung tam zawk Milan chu goal difference-ah an ṭha zawk a, Atletico tan tlang tur chuan Milan chakna aia goal hniha tam zawka chak zel a ngai tihna a ni.