India-in New Zealand an hneh

India-in mikhual New Zealand chungah zahngaihna an lantir lo a, second Test-ah 372 runs-in Black Caps an sawp. Frist Test-ah team pahnih an inhnehtawk a, Men in Blue hian series 1-0 in an la.

Coach thar Rahul Dravid hnuaiah India-in bul an ṭan ṭha a, T20 match thum khelhah 3-0 in an chak. Test match-ah pawh mualneitu an che ṭha chhunzawm a, first Test-a vanduai hnuin second Test-ah chiang takin an chak.

India captain Virat Kohli-a'n bat hmasak a thlang a, opener Mayank Agarwal-a'n 150 runs tehmeuh a siam zarah 325 runs an siam. Men in Blue tan a vawm lama thawh hlawk tak Axar Patel-a'n 52 runs a belh bawk.

New Zealand left arm spinner Ajaz Patel chuan wicket 10 a la a, Test innings khata wicket la vek thei pathumna a ni. Agarwal zarah India dinhmun a ṭha a, India bowler-te an chet ṭhat zui avangin first innings zawhah chak tur chiangah an ngaih theih.

Player of the series-a thlan Ravichandran Ashwin-a'n wicket li (8/4) a la a, Mohammed Siraj-a'n wicket thum (19/3) la bawkin New Zealand-in 62 runs chauh an siam. India-in second innings-ah 276 runs an siam belh a, wicket sarih an hlohin an duh tawk.

India-in New Zealand tan target 540 an chhawpsak a, Black Caps tan a sang mah mah - 167 runs an siam tihin an thi fai vek. Second innings-ah hian Ashwin (34/4) leh Yadav (49/4) ten wicket li ve ve an la.

Rahul Dravid-a kaihhruai India team hian South Africa an tlawh zui dawn. Test leh ODI match thum ve ve bakah T20 match li an khel ang.