India Squash team-ah Mizo nula

Squash inelna 20th Asian Team Cham-pionships 2021 chu November 20 leh December 4 chhung khan Kuala Lumpur-ah neih a ni a, India team staff-ah Mizo nula Lalthutiamngheti a tel. Inelnaah hian India mipa team-in silver medal an la a, hmeichhe team-in bronze medal an la bawk.

Champhai Vengsang nula Tiami, MPT(Sports and Manual Therapy) hi India team physio a ni a, tunah hian Chennai-a hmunpui nei Sri Ramachandra institute of Higher Education and Research, Arthroscopy & Sports Medicine Department, Centre for Sports Science-ah a thawk mek.

Tiami chuan, "Squash Rackets Federation of India-in kan department-ah physio an rawn dil a, National camp leh ram pum huap inelna ka tel tawh zarah hotuten min duhsak a, international event-ah a vawi khat nan ka tel," tiin Vanglaini a hrilh.

Mizo nula hian Olympian leh footballer lar tak tak a enkawl tawh a, chung zingah chuan India international Jeje Lalpekhlua, Lallianzuala Chhangte, Halicharan Narzary leh Nongdamba Naorem te pawh an tel a ni.