Benzema-a'n Inter hmachhawn dawn lo

Real Madrid striker Karim Benzema chu zanin dar 1:30-a Inter Milan an mikhual turah a inlan thei dawn lo chiang a, chutihrual chuan team pahnih hian Champions League last 16 an luh tawh tho avangin Real tan a pawi lutuk lo ang.

Kum 33 mi Benzema hi kartawpa Real Sociedad an hneh ṭumin hliam vangin lakchhuah a ngai a, he thu buatsaih a nih lai hian a chawlh chen tur sawi chian la awm lo mah se Inter erawh a hmachhawn dawn lo chiang.

Real hian Pathianni zan dar 1:30-ah Madrid derby khel turin Atletico Madrid an mikhual dawn bawk a, league hmahruaitu Real tan champion turin chak a pawimawh dawn - he inkhelah pawh hian Benzema hi a lo la kir lo mai thei.

Hetihlai hian Inter erawhin chanchin lawmawm an nei a, striker Lautaro Martinez chu Real hmachhawn turin a dam hman - Argentine striker hi Inter-in 3-0 a AS Roma an sawp ṭum khan inkhel lo mah se bench-ah a awm tawh a, mamawh chuan chhawr theih a ni tihna a ni.

Real leh Inter hian last 16 lut ve ve tawh mah se zanin inkhela chak zawk hi group hmahruaitu an ni dawn - group hmahruaitu nih hi round of 16-a team ṭha pumpelhna a ni a, team pahnihin tha an thlah lo ang.

Group D inkhel dangah zanin dar 1:30-ah vek Shakhtar Donetsk-in Sheriff Tiraspol an mikhual dawn a, Sheriff hi pathumna an nih chian tawh avangin inkhel result-in awmzia a nei lo ang.