Conte leh Gerrard an chak

Antonio Conte-a'n Tottenham Hotspur a enkawl hnuah league match li a team a kaihruai tawh a, point an hlawhchhuah zat chu point 10 a ni - match khata khel tlem chunga palina West Ham an phak lohna chu point hnih chiah a ni ta!

Spurs hian tlak hlau Norwich City chu Pathianni zan khan 3-0 ngawtin an sawp a, Lucas Moura-a'n defender pahnih a paltlang hnua Son Heung-min nen an in one-two hnuin mawi zetin goal hmahruai a khung.

Norwich-in Teemu Pukki hmangin hmahruaina hun nei ṭha mah se Pukki-a'n a chance neih a chhawr lo a, kum 20 mi Adam Idah chuan uiawm takin si phurh sutna hun a neih a khawhral bawk - Spurs-in Davinson Sanchez leh Son hmangin an khung belh thung.

Tun season Premier League-a goal khat chiah la khung Harry Kane-a'n a chance neih a chhawr lo a, English striker-in Conte hnuaia league-a a goal hmasa ber khungna remchang a neih chu a hlah.

Conte chuan, "Kan hma hunah beisei neih a, nomawi chawi kan duh a nih chuan ṭan hmun nghet leh ṭha tak din kan mamawh a, Tottenham tan chuan tun season chu thawhrimna hlirin a khat ang," a ti!

Hetihlai hian Steven Gerrard pawhin Aston Villa a chakpui leh ta a, an mikhual Leicester City chu 2-1 in an hneh - Foxes hi Liverpool-a Gerrard lo enkawl tawhtu Brendan Rodgers-a enkawl an ni.

Foxes tan Harvey Barnes chuan minute 14-na lekah goal hmahruai khung mah se Ezri Konsa chuan minute thum hnu lawkah a chhanglet a, Konsa vek hian minute 54-naah chakna goal a khung bawk.

Gerrard-a'n Villa a enkawl hnuah Brighton & Hove Albion (2-0), Crystal Palace (2-1) leh Leicester City (2-1) a hneh ta a, a hneh loh awmchhun Manchester City (2-1) lakah pawh Villa an khel ṭha hle.

Rangers boss hlui Gerrard chuan, "Kan result avangin ka lawm a, mahse, chinfel tur tam tak kan la nei. Foxes lakah pawh kan buaina chingfel turin chawlhlawkah kan nihna tak kha na deuh taka sawi a ngai tlat.

"Player-te hnena kan sawi theih awmchhun chu theihtawp chhuah tura fuih a ni mai. Second half-ah kan khel ṭha a, mahse, chawlhlawk laia khati taka ṭawng ngai kher lo khan minute 90 chhung kan khel ṭha thei ang em, tih hi kan buaina tur chu a ni," a ti a, a lawm a kim lo.

Villa hian December 11 zanah Liverpool an lenchilh dawn a, ropui taka a lo khelh tawhna hmuna coach anga Gerrard kir tur hian Liverpool fans tam tak lung a tileng lawk.