Hero Senior Women's NFC semifinal Mizoram leh final daidantu Railways

Hero Women's National Football Championships semifinal chu vawiin hian khelh a ni dawn. Chawhma dar 9:30 hian EMS Corporation Stadium-ah Mizoram leh Railways te an inkhel ang a, chawhnu dar 2:30-ah Odisha leh Manipur te an inkhel bawk ang.

Mizoram team hian inelna kalphung thara quarterfinal an thlenna hmasa ber a ni a. Coach F. Lalrozara leh Lalrindika Hmar kaihhruai Mizoram team hian nomawi beiseina chhi nung a, final lut turin Railways an hneh a ṭul dawn a ni.

Siuuu...
Mizoram team boruak hi a ṭha takzet a, team enkawltute an fakawm. Coaching staff Rozara, Rindika, K. Lalhlimpuii (manager) leh Lalramngaihawmi (physio) te leh player-te inkungkaihna a ṭha. Khelmual pawna an inpawh tlanna hian khelmual chhungah result a hringah a ngaih theih.

Mizoram inkhel hi quarterrfinal aṭang khan YouTube channel 'Indian Football'-ah a en theih a, Mizo nula te chevel a hmuhnawm hle. Goal an khung zawha an lawm dan thlengin commentator-in sawi zui nuam a ti.

Mizo nulate hian Cristiano Ronaldo celebrate dan entawnin khelmualah a huhoin an 'siuuu' rual a, Maharashtra an hneh ṭuma goal lina an khung ṭum phei chuan goalkeeper pawh a rawn tel vek. Inkhelh hma warm up hi khelmualah an ṭan lo a, hotel an chhuahsan a, bus an chuan rualin rilru lam an sawizawi ṭan a, khelmual an thlen meuh chuan inkhel turin an inpeih tawh hle.

Mahse maw...
Chanchin duhawm te pawh hian a hmawr bawk loa tawp hun a nei ve ṭhin a, Mizoram hmeichhe football zin kawng ngaihnawm pawh hi an hmaah Railways an awm miau avangin a hun hmaa tawp thei dinhmunah a ding.

Hmeichhe football inelna hnuhnung berah khan Mizoram leh Railways hi group khatah an awm kawp a, match hmasa berah Railways hian 4-0 in an sawp. Tun ṭumah pawh hian Railways hian team ṭha an ni tih an result aṭangin an pholang.

Railways hian group match-ah Dadra and Nagar Haveli chu 5-0 in an sawp a, Chattisgarh pawh 4-0 in an hneh. Semifinal-ah Goa an hmachhawn a, 4-2 in hnehna an chang. Railways hian Mizoram an hmachhawn hnuhnung bera an goal khung zat goal li chu an match hnuhnung pathumah hian an khung vek a, Mizoram tlarhnung thuam ṭhat a ṭul dawn.

Railways jersey number 10 Mamta chuan match thum lekah goal sarih a khung tawh a, mak ang reng tak erawh centre back Supriya Routray-i'n Goa lakah hattrick siamin tun inelnaah goal li a khung.

Engtin zel?
Mizoram assistant coach Lalrindika Hmar chuan, "Team 32 aṭangin pali chiah kan awm tawh a, tumah hi an chhe thei tawh lo. Vawi khat tihsual a pawi tawh ang. Covid-19 inkhuahkhirhna vangin Railways khel hi kan la en bik lo a, tournament ṭan hmaa team ṭha ber zinga an sawi chu an ni. Mahse, kan naute kan ring tawk a, kan game pangngai an khel chhuak leh a nih chuan Mizoram hian a vawikhat nan final kan lut ve thei ang.

"Minute rei lotê chhungin eng game nge an rawn play kan lo zir vat ang a, an chak lohna leh an chakna zir chungin fimkhur tak siin kan hmachhawn ang. Zoram mipuite in mi ṭawngṭaipuina kan dil leh e," tiin Vanglaini a hrilh a, final thlen an inbeisei.

Semifinal - Vawiin Inkhel Tur
Mizoram 9:30 AM Railways
Note : Mizoram inkhel hi AIFF YouTube channel 'Indian Football'-ah en theih a ni ang.

Thawnthu hlui
Mizoram hmeichhe team hian kum 2006 khan National Football Championship-ah quarterfinal an thleng tawh a, hemi ṭuma inelna kalpui dan erawh a dang thung. Inelna hi Bhilai, Chattisgarh-ah February 10-26, 2006 chhungin khelh a ni a, Mizoram team hi coach K. Zosangliana leh Vanlalmuana ten an ho. Qualifying round-ah Mizoram hian Pondicherry 7-1 in an sawp a, Assam nen 2-2 in inhnehtawk lehin Orissa lakah 4-0 in tlawm mah se pahnihna ni chungin quarterfinal an lut. Hemi ṭuma quarterfinal-ah hian team 12 an awm a, team thum zelin group paliah an ṭhen sawm. Mizoram hian Tripura 8-1 in an sawp a, beiseina sang tak nei mah se champion zui ta Manipur lakah 6-0 a an tlawm avangin semifinal an lut pha ta lo.