Tripura Health Depart­ment chuan state chhunga Covid-19 hri lengin ziaawm lam a la pan loh vangin zirna hawn phalna a la pe duh lo a, hei vang  school leh college hawn hun chu sawn hlat leh rih a ni. 

State sorkar chuan November 26 khan school hawn hun chungchang sawipuiin, education department-a official-te chu high-level meeting a lo neihpui tawh a ni. Meeting-ah hian December 1 aṭangin Class 10-12 hawn an rel. 

Mahse Health Deptt chuan thuchhuah siamin,  hri leng chungchangah state dinhmunte thlirin zirna in hawn hun hi sawn hlat a nih tih a sawi. Zirlaite tan online class erawh chhunzawm zel turin a ti thung. Ramchhung hripui a len hnu, March thla aṭang khan zirna in hrang hrangte hi khar an la ni. 

Hetih lai hian Assam sorkar chuan nakkum January 1 aṭangin school zawng zawng hawn turin a ti. November thla aṭang khan Class 6-12 inkar chu school kaltir an lo ni tawh a,  hemi hnu hian January 1, 2021 aṭangin elementary school-te pawh hawn vek a tum tawh a ni. 

College leh university hostel-te pawh  hawn phalsak a ni tawh dawn a, Class 10 leh 12 zirlaite pawh hostel-ah an awm phalsak an ni tawh ang.