North London Derby Rinkai Spurs vs Rinkai lo Arsenal

Premier League inkhel hmuh-nawm leh boruak sang an sawi changa rilru luah ṭhintu 'North London Derby' chu Pathianni zan dar 10:00 hian Tottenham Hotspur Stadium-ah khelh a ni dawn.

Season an hman dan thlir chuan Jose Mourinho enkawl Tottenham hi chak tura rinkai zawk an ni a, mikhual Arsenal hi rinkai lo zawk an ni ang. An sulhnu en chuan Gunners an chungnung zawk, tun dinhmunah erawh Spurs hi league hmahruaitu an ni thung.

Great Britain inkharkhipna a zo rih a, kumin March thla hnua a vawi khat nan stadium chhungah fans an lut ṭan leh tawh. Zanin pawh hian Tottenham ṭantu mi 2,000 chuan a hmunah an en thei dawn, stadium ruaka inkhelh ai chuan boruak a awm ngei ang.

Mourinho chuan, "A hmuna entu an awm thei tur hi chanchin lawmawm a ni, fans lam pawhin entu 2000 zinga tel thei nih kha an châk hle ang. A bul kan ṭan ṭha leh dawn a ni a, hun rei vak lo hnuah football pangngai kan khelh leh ka beisei," a ti.

Ningani zan khan Arsenal chuan a hmuna entu awm boruak hi an lo tem tawh. Europa League-ah fans nei chungin hnehna an lo chang tawh a, zaninah erawh an hmelma fans an hmachawn tel a ngai dawn thung.

Gunners manager Arteta chuan, "Mi 2000 chauh an ni a ni mai thei, mahse an thawm kha ring tak a ni. Hnehna kan chan theih nan nasa takin min pui," tiin a sawi. Spurs lamin zaninah 'fans boruak' an tem ve dawn.

Mourinho-a'n Lask hma-chhawntu zingah Harry Kane a hruai tel lo a, zaninah erawh a inlan ang. Portuguese manager hian, "A hliam dinhmun tak ka sawi lo ang, mahse Arsenal chu a hmachhawn thei ang," tiin a lo sawi tawh.

England international striker hian Premier League season kal laiah goal sarih khungin a ṭhiante khung tur vawi kua ngawt a siamsak tawh. Kum 27 mi hian a vanglai a hman mek avangin Arsenal tlarhnung tan ven bik ngai a ni ang.

Kane hi striker dik tak, goal khung tura awm ṭhin ni mah se Mourinho-a'n a khelh dan phung a thlak danglam hret. Ball zawng turin midfield-ah a let fo a, defender pawt khawmtu a ni bawk. Kane-a'n hmunruak a siamah Son Heung-min a lo tlazep ṭhin.

South Korea international Son leh Kane hi EPL tlarhma player inkawp fuh bera chhal ngam an ni mek a, zaninah pawh Gunners tlarhnung pal darh turin an hriam tawk ang tih a rin theih. Anni pahnih pui tur hian tharum ngah Tanguy Ndombele leh Moussa Sissoko te an awm bawk.

Arteta hoin FA Cup an chawi a, fans an hlim. Community Shiled an lak hnu phei chuan beisei an nei sang hle. Mahse Gunners hian beisei angin season an ṭan lo, nomawi chu sawi loh a sang pali zinga tel phak ringawt pawh thil huphurhawm tak a ni ta.

Europa League group stage an paltlang tawh avangin Arteta-a'n Rapid Vienna lakah a player neih ṭhat a chhawr lo. Spurs lakah chuan Pierre-Emerick Aubameyang hoin an inlan ang, defender David Luiz erawh a dinhmun a chiang lo.

Mesut Ozil hnawltu Arsenal midfield a chiri ṭhin a, striker tana ball pe thiam an awm loh avangin Auba pawhin a goal khung a chawlhsan niin a lang. Beiseina sang tak nena an lakluh Thomas Partey-a'n Manchester United lakah a theihna lantir tawh mah se hliam vangin a chawl mek.

Arteta tan an hmelma Tottenham hneh tur chuan tlarhnung rem phui ringawt a tawk dawn lo, goal khung a pawimawh. Pound maktaduai 72 man Nicolas Pepe hrem vangin a inlan thei dawn lo, coronavirus kai dam hlim Mohamed Elneny erawh a inkhel leh thei tawh thung.

Premier League match an khelh hnuhnung pariatah Arsenal-in goal nga chauh an khung a, table-ah 14-na dinhmun an luah. Hmahruaitu Tottenhman an phak lohna chu point riat a ni.

Arsene Wenger kaihhruaina hnuaia attacking game hmuhnawm khel ṭhin hi an inkhel a hmuhnawm tawh lo a, goal khung ai chuan a venhim lam an buaipui rih zawk. Spanish manager-in a naute a khelhtir dan chuan sawisel a hlawh mek.

Arteta chungchang sawiin Mourinho chuan, "Coach ṭha tak leh talent nei a ni, ni lo se la chuan Arsenal a enkawl lo ang - coach ṭha lo tan enkawl theih a ni lo. Hun rei lote chhunga nomawi a hlawhchhuah te kha a ropui," tiin a khingpui tur a fak a, a rilru tak tak a sawi em tih erawh hriat a ni lo.

North London Derby khel tur team pahnih hian Ningani zan khan Europa League an khel ve ve. Tottenham chu Lask nen 3-3 a an inhnehtawk laiin Arsenal erawh an mikhual Rapid Vienna lakah 4-1 in an chak thung.

Spurs hian goal phur hmasa mah se Gareth Bale-a penalty hmanga an sut hnuah Son Heung-min leh Dele Alli (P) te hmangin ṭum hnih hma an hruai let. Amaherawhchu an goal khung zat tho an chhuah vangin manager Mourinho a lawm lo.

Mourinho chuan, "Tun hmaa Manchester United ka enkawl lai pawhin hetiang boruak hi ka tawng tawh, ka naute rilru put hmang kha fuh tawk lo a awm, chuvang chuan group stage ah duhthusam result kan nei lo a ni.

"Knockout stage-ah chuan team ṭha zawk kan hmachhawn dawn a, chumi hunah chuan tun aia ṭha zawk hian kan khelh mai a rinawm. A nihna tak sawi chuan Europa League group stage hi chu player ṭhenkhatin an la thutak tawk lo," tiin a sawi.

Tottenham an chak zawh loh laiin Arsenal erawh match nga an khelh tawhah an chak vek. Player naupang leh khel tlem zawk chhawr chung pawhin Rapid Vienna lakah harsatna an tawk lo. Alexandre Lacazette, Pablo Mari leh Eddie Nketiah ten goal an khung hnuah Austrian club tan Kohya Kitigawa chuan sut ṭhen ve mah se, inkhel chawhnu lamah substitute Emile Smith Rowe chuan Gunners chak nemnghehna goal a khung.