Leipzig tan beiseina nung

RB Leipzig-in Nilaini zanah Istanbul Basaksehir 4-3 in an hneh a, chakna goal hi injury time-a substitute Alexander Sorloth-a'n a khung a ni.

Leipzig manager Julian Nagelsmann chuan, "Sorloth hian khelhna hmun a chang tam tawk lo a, khelmualah player dang nen an la inkawp rem tawk lo. Amaherawhchu striker tana pawimawh ber chu goal khung a ni a, chu chu a ti a ni," tiin goal khungtu a fak.

Kum 33 mi Nagelsmann-a hote hian Turkey ramah point an hlawhchhuah avangin an match hnuhnung bera Manchester United an hneh chuan last 16 an lut ang. Leipzig hi Bundesliga-ah pahnihnaah an awm mek a, Inrinni zanah hmahruaitu Bayern Munich hmachhawn turin Allianz Arena-ah an lenglut dawn. Hemi zawh hian United an hmachhawn nghal dawn.

Man United manager Ole Gunnar Solskjaer pawhin, "Kan kutah a awm," tiin a sawi ve bawk a, amaherawhchu an inkhelhna tur hmun hi Leipzig a nih dawn avangin point hlawhchhuah a harsa ang.