The Amizos an kim tawh

Ṭhian sawi nana 'Amigos' tih hman ṭhin chu NorthEast United-a Mizo player-te tan 'The Amizos' tia thlaksak an ni a, Highlander Mizo player-te hi zanina inlan turin an dam kim tawh - dar 7:30 hian East Bengal nen an inkhel ang.  

Season ṭan tirah quarantine vangin Lalkhaw-puimawia (Mapuia) leh Rochharzela-ten an ṭhiante an zawm ve lawk thei lo a, zaninah erawh Mizo player-te an dam kim tawh - an inlan leh lan loh chu coach Gerard Nus-a thu a ni ta. 

NorthEast United-in an match hnuhnung bera 1-1 a FC Goa an inhnehtawkpui ṭumin Lalengmawia (Apuia) chuan captain armband a rawn hreng a, ISL-a captain ni thei naupang ber record a siam. 

Apuia bakah hian Lalrempuia Fanai chu Nus hnuaiah player pawimawh a ni a, Goa lakah hian Rochharzela chu bench aṭanga luhtir a ni a, zaninah chhawr theih turin Mapuia a awm ta bawk. 

Jeje Lalpekhlua'n a khup hliam chu 100% a a dam tawh thu a sawi a, an match hmasa pahniha tlawm ve ve East Bengal tan Hnahthial tlangval hian bul a rawn ṭan a nih pawhin a mak lo ang. Ningani zan ISL inkhelah Mizo awm lohna ATK Mohun Bagan chuan 1-0 in Odisha FC an hneh a, inkhela goal awmchhun hi hun pek belh minute nganaa Roy Krishna khung a ni. 

Odisha tan Samuel Lalmuanpuia chu minute 67-naah bench aṭanga luhtir a ni a, Odisha-ah hian Lalhrezuala Sailung, Isak Vanlalruatfela, Jerry Mawihmingthanga (inhliam), Paul Ramfang-zauva leh Daniel Lalhlim-puia te chu Mizo awm an ni - Pathianni tlai dar 5:00-ah Odisha hian Hmingthanmawia khelhna Mumbai City an hmachhawn ang. Pathianni zan dar 7:30-ah hian FC Goa leh Kerala Blasters an inkhel dawn bawk a, Blasters hian Lalruatthara leh K. Lalṭhathanga (Puitea) chu Mizo player an kawl a ni.