Premier League leh EFL an inrem

English football-a league sang ber Premier League leh a hnuai lam league ho enkawltu English Football League-te chuan nizan khan EFL club-te khaichhuahna turin inremna an nei a, Premier League hian EFL-in pound maktaduai 250 ṭanpuina an hmuh theih nan an pui dawn a ni. 

Premier League hian Covid-19 vanga sum lama harsatna tawk Championship club-ten pound maktaduai 200 loan an lak theih nan pound maktaduai 15-a pe dawn a, Championship club-te loan lak turah hian a pung a awm dawn lo thung. 

Club pakhatin loan an lak theih zat tura tih hi pound maktaduai 8.33 a ni a, June 2024-a rulh zawh tur a ni ang. Pound maktaduai 50 hi League One leh League Two club-tena an hman tur a ni thung ang. 

EFL chairman Rick Parry chuan, "Inbiakna kan kalpui chhung zawnga kan thil tum ber chu hri leng vanga sum lama harsatna tawktu EFL club-te an talchhuah theihna tur hi a ni a, inremna a awm thei ta hi lawmawm ka ti takzet a ni," a ti. 

Premier League chief executive Richard Masters chuan, "Premier League chuan football inkhaidiatna hi a ngai pawimawh em em a, tualchhunga club-te pawimawhna ka hre bawk. Hei vang hian Covid-19 vanga eng club pawh an talbuai hi kan duh lo a ni," tiin a sawi ve bawk. 

League One leh League Two-te dawn tur pound maktaduai 50 aṭang hian pound maktaduai 30 chu he league-a club 48-in an insem nghal ang a, pound maktaduai 20 hi a ṭul dan a zira sem zui tur a ni - sum sem dan tur hi Premier League leh EFL aiawhten an en pui ang. 

Championship hnuai chiaha League One club-te hian a tlem berah £375,000 (Nuai 371.96) ṭheuh an dawng ang a, League Two club-ten a tlem berah £250,000 (Nuai 247.97) ṭheuh an dawng bawk ang - an sum insem dan tur hi 2019-20 leh 2020-21 a ticket hralhna tur an hloh aṭanga chhut tur a ni ang.