Zanin dar 1:30-ah Chelsea Vs Leeds 'Spy Gate Saga' i hre tawh ngai em?

Zanin dar 1:30-a Chelsea leh Leeds United inkhel tur hi team pahnih khelh dan phung avangin en a châkawm sa tawh hrim hrim. 'Spy Gate Saga' chungchang hre tel tan phei chuan Frank Lampard leh Marcelo Bielsa te Stamford Bridge-a an intawng tur hi a ngaihnawm lehzual.

Chelsea leh Leeds te hi chu Premier League-ah kum 2004 hnuah a vawi khat nan an intawng leh dawn chauh a, manager pahnihte erawh Championship lamah an inchal tauh tawh thung. 2018-19 season khan team pahnih hi vawi thum an inhmachhawn a, Bielsa enkawl Leeds hian Lampard-a kaihhruai Derby chu vawi li an inhmachhawnah ṭum thum an hneh. Amaherawhchu Lampard-a hote hian playoff-ah Bielsa hote an hneh a, Leeds United-in season khatin Premier League an khelh har phah. 

Nikum January 2019 khan Police-in Derby County training-na hmun Oakwood-ah enthlatu nia rinhlelh an nei a, an man. An han hriatchian chuan Leeds hnathawk a ni a, Bielsa pawhin coaching staff zinga mi a nih thu leh Lampard-a inpuahchahna en tura tirh a nih thu  a sawi.

Championship-a thuneitu EFL-in Leeds hi £200,000 chawi turin an ti a, Bielsa chuan club thuneitute a rawn loh avangin pawisa pawh hi a chawi vek. Leeds hian 2-0 in Derby hi an hneh zui a, 'Spy Gate Saga' pawh a reh mai lo.

Hetih hunlaia Derby County boss Lampard chuan Bielsa-a'n ngaihdam a dil lo chu a pawm thiam thei lo. Argentine manager Bielsa erawh press conference koin a insawifiah a, Derby inkhel en tura a mi tirh hi chu a inpuahchahna dang thlir chuan eng tham a nih loh thu a sawi.

Bielsa hian Derby hi season hmasa lama an khelh dan zawng zawng chu a zirchian vek thu a sawi a, match pakhatah darkar li zel a hman thu 'power point presentation' nen a sawifiah bawk.

Hemi hnu hian Lampard aiin Bielsa-a'n Derby khelh dan a hrechiang zawk tih fiamthu a awm phah. Leeds ṭantute lahin 'Stop crying, Frank Lampard' hla an phuah phah bawk.

Leeds United boss Bielsa chuan hemi season hian Aston Villa nen an inkhelh ṭumin thutlukna danglam tak a siam. An goal khung dan a dik tawk loh avangin Argentine manager hian a naute chu Villa chu goal khung tir ve turin thu a pe.

FIFA chuan Bielsa hi  nikum kum tawp khan 'Fair Play' award an hlan a, Lampard a thinur hle. English manager chuan, "Mak tiin ka nui. Tuin nge vote a, an khingpuite khelh dan a en thla ṭhin tih chu ziak thlapin a awm si a. Heti chunga Fair Play award a dawng hi a hriatthiam theih loh," tiin a sawi.

Marco Bielsa-a'n Premier League-ah Leeds United a kaipui a, team hmuhnawm ber zinga mi an ni nghal. Whites hian an match hnuhnung berah inkhel thunun chungin Everton 1-0 in an hneh a, game hmuhnawm an khel tel bawk.

Leeds hian Premier League an khelh takah chuan sum pawh an hmang a; Rodrigo (£26m) leh Raphinha (£17m), Robin Koch (£13m) te manto takin an lalut. Chutihrualin an player manto ber Rodrigo hi rinrawl a ni pha lo a, Championship champion-na tura player ṭangkai Patrick Bamford a pawimawh zawk.

Bielsa khingpui tur Chelsea hi an ṭhatsa bakah player lak nan sum an hmang tam - pound maktaduai 200 chuang an seng. Tunah chuan Blues hi Premier League chauh ni loin Europe-a team ṭha ber nih tumin Frank Lampard-a hoin hma an la mek.

Zanina an inkhelhna tur hi Stamford Bridge a nih bakah Chelsea an khelh ṭhat tluan bawk avangin Frank Lampard-a hote hi chak tura rinkai zawk an ni dawn. Chutihrualin an hmaa ding tur hi khingpuite khelh dan tur chipchiar taka zir ṭhin Bielsa hote an nih avangin eng result pawh a thleng thei ang.