Mipui 2000 hmaa Wolves mikhual tur Reds

Pathianni zan dar 12:45-ah Liverpool chuan Premier League match khel turin Wolverhampton Wanderers an mikhual dawn a, fans 2,000-in a hmunah inkhel hi an en ang. 

UK sorkarin stadium-a fans punkhawm a phal leh ṭan tawh a, Liverpool khawpui hi Tier 2-ah dahin fans 2,000 thleng punkhawm a phalsak - mi 54,074 lenna stadium-ah 2,000-in inkhel an en dawn tihna a ni. 

Inkhel en thei zat hi tlem viau angin lang mah se entu awm lo ai chuan boruak an siam ang tih a lang a, mipui kir theih ruala Anfield-a lenluh hi Wolves-in an ṭawngṭai chhannaa pawm an harsat ang. 

Covid-19 vangin fixture a chep lo thei lo a, chumiin a hrinchhuah chu player inhliam a ni. Rei tak chhung inkhel entu an awm loh avangin tun hma angin stadium boruak a 'hot' tawk lo bawk. 

Players an inhliam nasa a, stadium lenluh ṭihbaiawmna ṭhinah pawh mikhual team an chak leh nawlh zel - hemi tuar nasa pawl chu club lian ho an ni a, Liverpool chu a tuar langsar an ni. 

Reds hian 3-0 a Leicester City an sawp hnu lawkah Italy-a an sawp hnu Atalanta chu Anfield-ah 2-0 in an ngam lo zui a, Brighton & Hove Albion chu 1-1 in an inhnehtawkpui bawk - Champions League-ah 1-0 in Ajax an hneh leh tawh a, an ṭhat dan ber erawhin an la khel lo. 

Liverpool result a chhia leh ṭha inchhawk chhan ber chu hliam an ngah vang a ni a, zaninah pawh senior player pariat zet inhliam nei chungin Wolves an mikhual dawn. 

Ajax an hmachhawn hmain Reds hian Alisson Becker inhliam thu an hria a, Jurgen Klopp-a'n Ajax laka che ṭha tak Caoimhin Kelleher leh Adrian laka a rin tur zawk hi hriatthiam a harsa. Reds player inhliam zingah midfielder Naby Keita (malpui) chu Wolves laka kir tura beisei a ni a, right back Trent Alexander-Arnold (chawn) a lo kir hnai a, Virgil van Dijk (khup), Joe Gomez (khup), Xherdan Shaqiri (malpui), James Milner (malpui), Thiago Alcantara (khup) leh Alex Oxlade-Chamberlain (khup) te lo kir hun tur sawi lawk theih a ni lo thung. 

Liverpool-in Wolves aṭangin Diogo Jota an lalut a, a man zat hi pound maktaduai 45 thlenga sang chho thei tura tih a nih avangin fans tam takin rinhlelhna nen an lalut. 

Mahse, Portuguese forward hian amah ringhleltute chhang-letin tun season match 15-a khelhah goal kua a khung der tawh a, Jurgen Klopp tana lu hai dan ṭha chi thlentu a ni. Klopp-a'n Ajax lakah Jota hi Mohamed Salah leh Sadio Mane nen a inkawp tir a, hei vang hian Wolves lakah chuan Roberto Firmino zawk a luhtir mai thei bawk - hriat tel tur erawh Klopp hian 4-2-3-1 hmangin player pali hi a khelhtir vek thei bawk. 

Ajax lakah khan Liverpool captain Jordan Henderson leh Andrew Robertson-ten hliam an nei bawk a, anni erawh Klopp chuan ngaihtuahawm an nih loh thu a sawi. 

Wolves-in an ṭhat dan berin an khel dawn bik lo - Pathianni zana  2-1 a Arsenal an hnehna inkhelah hliam vangin Raul Jimenez chu lakchhuah a ngai a, Mexican striker tel lo chuan Wolves tlarhma a bil 

sawt dawn. Hetihrual hian Pedro Neto leh Adama Traoré an la nei tho tih erawh hriat a ṭha a, hnehna an chang a nih erawh chuan 'upset' huang chhunga dah theih a ni ang.