Demiral tan kum a tawp?

Juventus defender Merih Demiral chu Dynamo Kiev nen Champions Legaue an khelh ṭumin a tihrawl a hliam a, a chawlh chen tur la chiang lo mah se kumin chhungin a inkhelh hman a beisei awm tawh lo.

Old Lady chuan thu chhuah siamin, "A malpui vei lam a hliam a, a rei lo berah kar hnih chu a chawlh a ngai dawn. Ni 10 hnuah a hliam hi endik leh a ni dawn a, chumi hnuah chuan December thla chhungin a rawn kir hman dawn em tih a chiang ang," an ti.

Italian champion hian zanin dar 10:30-ah Torino an mikhual dawn a, an defender hi a inlan thei lo nghal ang. Barcelona nen UCL group match hnuhnung ber an khelh hunah pawh a inlan thei dawn lo tih a chiang tawh. Andrea Pirlo kaih-hruaina hnuaiah Juve hian duhthusamin season bul an ṭan fuh lo. Serie A match kua an khelh tawhah point 17 neiin palina dinhmun an luah, holam taka point an hloh fo a nih chuan nomawi an kawl lai humhim a harsa ang.