Neymar-a'n Messi khelhpui a duh

Paris St-Germain-in Champions League-a 3-1 a Manchester United an hneh hnu lawkin Neymar chu zawhna pawimawh tak pek a ni a, chu chu Lionel Messi nena khelh dun a châk leh châk loh zawhna a ni. 

Neymar hian, "Ka thil duh ber chu Messi nena khelh dun leh hi a ni a, a kiang nuam ti taka khelmuala khelh leh hi ka châk em em a ni," tiin a chhang a, khawthlang media-te an phi nghal ruai!

Brazilian forward hian Messi nena an khelh dun theihna tur a nih chuan a hmun pawh Argentine legend a kian hreh lo a, Messi tan chuan eng pawh a huam. 

Neymar chuan, "Ka khelhna hmunah a khel duh a nih pawhin a khel mai ang a, buaina ka nei lo. Ka duh ber chu nakkuma khelh dun leh hi a ni a, season tharah chuan khelh dun ngei ka duh a ni," tiin a sawi. 

Nipui transfer lai khan Messi-a'n Barca chhuahsan duhin chhuah dilna lehkha a thehlut a, Messi hian a contract-a awm sa angin a thlawna chhuah theihna dan a neiah a inngai. 

Mahse, Barca-in Messi chhuah an phal lo a, pound maktaduai 624 aia tlawma a chhuah loh tur thu an sawi. Messi-a'n court-a Barca khin a duh loh vang chauhin Nou Camp-ah a cham chhunzawm.

Nipui rualin Messi contract a tawp dawn a, January hian a duh ang club be turin zalenna a nei. Barca president lailawk Carlos Tusquets chuan nipuiah khan Messi lo hralh se, an tihfuh zawk tur thu tun hnaiah khan a sawi!

Tusquets chuan, "Sum dinhmun thlirna aṭang chuan nipuiah khan kei chu ni i la, Messi ka hralh ang. A hlawh tam tak kan hum dawn bakah a hralhna aṭanga kan sum hmuh tur chu itawm tham tak a ni. Mahse, hei chu coaching staff-te thutlukna tur a ni a, ka thu a awm ve lo," a ti. 

Tusquets-a ṭawngkam aṭangin Barce-lona-a thuneitu ṭhenkhat chuan Messi chhuah an pawiti lo tih a lang a, Neymar-a'n Messi khelhpui a lo châk em em bawk si - "PSG-ah Messi kan hmu mai ang em?" tih zawhna a piang ta. 

Neymar hian kum 2017 khan Barca hi khawvela footballer manto ber ni turin PSG a pan san a, pound maktaduai 200 man forward hian Messi hliahkhuhna ata tal chhuak a, team pakhata a changtupa ber nih a duh vang a ni. 

Mahse, Brazil international hian tun thlengin a beisei ber Champions League leh Ballon d'Or a la dawng lo a, tunah chuan Messi nena khelh dun mawlh a buaipui leh ta. Brazil international hian season hmasa khan Messi khelhpui a chak avangin Barcelona-a kir dan tur a buaipui a, mahse a beisei angin inbiakna a hlawhtling lo. 

Neymar-a hnena zawhna an pek hian, an zawhna ber chu, "Paris-ah Messi hian rawn zawm che se i ti em?" tih a ni a, Barca-a khelh dun leh lam a ni lo tih hriat a ṭha.

Chutihrual chuan Messi hi a hlawh a tam tham em avangin PSG ang tan meuh pawh lakluh a harsa dawn. French football journalist Julien Laurens chuan PSG hian Messi an lalut dawn a nih chuan Kylian Mbappe leh Angel di Maria an chhuahtir a ngaih a rin thu a sawi. 

Laurens chuan, "Sum dinhmun thlirna aṭanga thlir chuan Messi, Neymar leh Mbappe kawl vek hi thil theih a ni lo a, Messi, Neymar leh Di Maria kawl vek pawh hi a harsa mai thei. Chuvang chuan Messi nei tur chuan Mbappe leh Di Maria kaltir mai hi a fuh ber ang. 

"Sum lamah chinfel tur tam tak a awm dawn a, hetihrual hian Paris khawpui lamah chuan Messi an mitthla ṭan der tawh," a ti a, Neymar chuan club thuneitute a biak a rin thu a sawi bawk. 

January-ah Barca-in President thar an thlang dawn a, president chuh tum zinga rin hlawh pahnih Joan Laporta leh Victor Font-te chuan thlan tlin an nih chuan Messi chelh tura hma an lak tur thu an sawi. 

Spanish football journalist Guillem Balague chuan, "Messi hian a chhuah duh thu chiang takin a sawi tawh a, President thar tih tur chu cham tura Messi hmin a ni. Neymar hian kum khat leh a chanve atan contract a la nei a, PSG aṭanga ani lakchhuah hi thil theih loh ang a ni. 

"Chuvang chuan Neymar-a'n Messi a khelhpui châk thu a sawi hian PSG-a an khelh dun chu a tih theih dan ber a ni. Nipui transfer-ah Real Madrid-in Mbappe lakluh an tum dawn a, hmun ruak zau tak a awm ang. "Tunah rih chuan Messi-a'n PSG lama Neymar-a zui theihna tur lam kan hawi mek a ni a, a phurawm takzet," a ti. 

Neymar hian Barca-a chhuahsan hnu kum khat lawkah khan Messi-a ngai a, player pahnih hian an khelh dun leh theih dan tur an ngaihtuah nghal!

Balague chuan, "Khel dun leh tur khan hma an la nasa hle. Neymar hian a chhuahsan hnu kum khatah Barca-a kir a tum a, mahse court thubuai kal mek a la awm avangin Catalan club hian an duh lo.

"Kum khat leh a chanve liam ta khan Messi hian, 'Kum hnih/thum velah chuan ka chhuak tawh dawn a, Barca star ber i ni thei ang. Mahse, kum hnih vel tal kan la khel dun thei dawn a ni,' tiin Neymar a hrilh a, Brazilian forward hian Barca-in amah laklet an tum anga lantir tumin hma a la hial a ni," a ti. 

January-a herchhuah hunah Messi chanchin hi ngaihnawm kan ti lehzual ang - zanin dar 1:30-ah erawh La Liga match khel turin Barcelona jersey nen Cadiz a lenchilh ang.