Milan lakah Celtic an tlawm

Celtic chuan goal hnih nei hmasa mah se AC Milan lakah an hum zo lo a, Scottish champion hi 4-2 in an chak lo. Europa League group H aṭangin Milan leh Lille te chuan last 32 an inhlangkai.

Ningani zan inkhel dangah Leicester City chu Zorya Luhansk mualah 1-0 in an tlawm a, Foxes hi group G hmahruaitu ni rih mah se an chung berah an awm tlang dawn em tih a la chiang lo, pahnihna Sporting Braga nen point 10 ve ve an nei mek.

Steven Gerrard-a enkawl Rangers chuan vawi hnih ngawt goal an phurh hmasak hnuah Standard Liege 3-2 in an hneh. Liverpool captain hlui enkawlna hnuaiah Rangers hian a zawnin Europa League last 32 an inhlangkai ta.

Stadium ropui San Siro-ah beisei nei tawh lo chungin Celtic an lenglut a, Tom Rogic (7') leh Odsonne Edouard (14') ten beisei loh takin goal an khung hmasa, point thum hlawh chhuak thei dinhmunah an ding hman. Mahse Serie A hmahruaitu Milan an zam lo. Hakan Calhangolu (24') leh Castillejo Azuaga (26') ten chawlhlawk hmain an si phurh an sut zo lo, inkhel chawhnu lamah Jens Petter Hauge leh Brahim Diaz te hmanga khung belhin an chak chiang hle.

Milan hi an coach Stefano Pioli chuan khelmualah a ho leh thei tawh. Italian manager hian coronavirus a kai avangin tun hnaiah a naute a kaihruai thei lo, tunah erawh hri lakah a fihlim leh tawh.

Pioli chuan, "Ni 18 chhung khung hran ka ni a, chumi hnuah ka lo kir ve leh thei ta. Ka nauten inrintawkna an la nei reng a ni tih a taka ka hmuh theih avangin ka lawm, tun anga kan khel zel thei a nih chuan season duhawm a nih ngei ka beisei," a ti.

Group G aṭangin Leicester City leh Sporting Braga te an tlang chiang tawh a, league match hnuhnung ber an khelh hunah hmahruaitu tur zawk a chiang ang. Hmahruaitu hian knock out stage-ah team nem zawk hmachhawn theih a nih avangin inkhel pawimawh a la ni ang.

Ukrainian club Luhansk-in last 32 lut thei tawh lo mah se an inthlahdah chuang lo. Hun tawp dawna Allahyar Sayyadmanesh goal khat khung hmangin an mikhual team an lo hneh a, chak lo Foxes tan inenfiah a ngai dawn.

Leicester manager Brendan Rodgers-a'n Fulham hneh lotu a naute aṭangin a neih ṭhat ho a dahṭha a, hliam dam hlim Ricardo Pereira, Caglar Soyuncu leh Wilfred Ndidi te an inlan thei thung - chak lo mah se player inhliam an dam avangin lawmna tur a awm, defender Soyuncu erawh a hliam nawn.

Rodgers chuan, "Inkhel pumpui kha kan thlir kir a nih chuan chak lo zawk nih kan phu lo. Chutih rualin football chuan lawmna min thlen rualin lungngaihna min siamsak ni a awm ṭhin," a ti. Foxes hian Pathianni zan dar 7:45 hian Sheffield United an lenchilh leh ang.