Zanin dar 11:00-ah Bayern vs Leipzig

Bayern Munich leh RB Leipzig te zanin dar 11:00 hian Allianz Arena-ah an inhmachhawn dawn a, Bundesliga hmahruaitu nih inchuhna a ni ang. Bavarians hi point 22 hmuin hmahruaitu an ni a, Leipzig hian point hnih chiahin an pha lo. 

Leipzig hian December 8, Thawhlehni zan hian Champions League-ah Manchester United an mikhual zui dawn. Hemi a nih avang hian ṭum dang zawng aiin Julian Nagelsmann hote inkhel hian ngaihven a hlawh dawn.

Hansi Flick-a kaihhruai Bayern hian season liam ta khan inelna lian pathumah nomawi an chawi a, tun season-ah pawh European champion zia an chhuah zel. Champions League-ah Atletico Madrid nen group khata an awm chungin hmahruaitu an ni chiang tawh.

UCL-a an dinhmun a ṭhat avangin Flick-a'n Atletico Madrid nen an inkhelh ṭumin Robert Lewandowski chu hliam tenau a neih avangin awltir a ni a, Leon Goretzka, Benjamin Pavard, Jerome Boateng leh Kingley Coman te pawh an inlan lo.

Player ṭha dang Thomas Muller leh Serge Gnabry te pawh bench aṭangin an lut a, hahdamna hun ṭha an nei thei hi RB Leipzig aia an dinhmun ṭhatna tur a ni thei ang.

RB Leipzig erawhin harsa takin Instanbul Basaksehir lakah 4-3 in hnehna an chang a, chakna goal hi injury time-ah an khung chauh. Nagelsmann-a'n Turkish club lakah point thum hlawh chhuak mah se goal thum an chhuah avangin tlarhnung insiamṭhat a ṭul tih a hria ang.

Bavarians lakah Leipzig-in fimkhur takin an khelh a ṭul dawn. Defender ṭha Dayot Upamecano-a'n hrem vangin Manchester United hmachhawn thei dawn lo mah se Bayern Munich nen chhawr 

theih a ni.

Flick-a hote hi Bundesliga-ah goal 31 khung tawhin goal khung tam ber an ni a, Leipzig hian goal ruk chiah la chhuahin goal chhuah tlem ber an ni thung. Nagelsmann hoten Allianz Arena an tlawh hnuhnung berah pawh goal awm loin an inhnehtawk a, club pahnih hi an intawnna hnuhnung pathumah an inhnehtawk vek avangin Bayern hi chak chiang saa dah a rem lo ang.