Mizoram Electoral Roll thar chu nimin khan district tinah tlangzarh a ni a, Mizoramah voter 8,69,813 an awm a, kum 2024 electoral roll aiin voter 13,516-in an tam zawk.
Electoral roll tharah hian voter 8,69,813 zinga 4,20,888 chu mipa niin, mi 4,48,925 chu hmeichhia an ni a; kum 2024-a electoral roll hman hnuhnun ber February 8, 2024-a tihchhuahah voter 8,56,297 awmin, kumina electoral roll tharah hian voter 13,516-in an tam zawk. Nikum aia kumina voter punna hi 1.58% a ni.
Electoral roll pangngaiah voter 8,69,813 an awm bakah hian service voter 4,294 an awm a, mipa 4,203 leh hmeichhia 91 an ni. Mizorama vote nei zawng zawng (electoral roll pangngaia hming chuang leh service voter) zat chu 8,74,107 an ni. Mizoram pumah polling station 1,301 a awm mek bawk.
Mizoram Electoral Roll thar hi nimin khan district tinah district election officer (DC)-te'n an tlangzarh a; tlangzarhnaah hian sorkar official-te bakah, political party aiawhte leh tlawmngai pawl ṭhenkhat aiawhte an tel. Political party tin hnenah electoral roll copy pek nghal a ni.
Electoral Roll 2025-ah hian January 1, 2025-a kum 18 tling chin thun a ni a; October 1, 2025-a kum 18 pumhlûm hman turte tan mahni awmna bialtu ERO/AERO/BLO hnenah electoral roll-a thun dilna thehluh zel theih a la ni a; https://voters.eci.gov.in leh Voter Helpline application aṭangtein dilna thehluh theih a ni bawk.
