Ṭhál chhunga kawng siam zo turin Dy Speaker-in kawng siamtute a chah

Assembly deputy speaker Lalfamkima, Kolasib bialtu MLA hoin nimin khan Kolasib DC conference hall-ah Kolasib district-a NH 306 & 06 thawm ṭhat hna chak zawka thawh dan tur sawiho a ni. Lalfamkima chuan, ṭhál laiin kawng siam zawh a nih theih nan theihtawp chhuah turin NHIDCL leh contractor-te a chah.

Deputy Speaker chuan, National Highway no. 306 & 06 siam hna thawh mek chu ṭha taka siam a pawimawh thu leh chak taka kalpui a ṭul thu a sawi a, "Ṭhál laia kawngpui siam zawh a nih theih nan NHIDCL leh contractor-ten theihtawp chhuah rawh u. Harsatna in neihte Mizoram sorkar hnenah a rang lamin rawn thlen zel ang che u," a ti.

Lalfamkima hian kal khawmte chu hna thawh hun (working season) rei lo te chhunga chak taka hmalak a nih thei nan an ngaihtuahna sêng turin a chah bawk.

Kolasib DC Robert C Lalhma-ngaiha pawhin thu sawiin, NH 306 & 06 siam chungchangah vawi tam tak ṭhutkhawm a nih tawh thu leh tun working season chhunga hna zawh hman a nih loh chuan Mizoram mipuiin NHIDCL leh an hnuaia contractor te, PWD (National Highway)-te an dem hle dawn tih a sawi.

Bawrhsap chuan, fûr khaw chhiain a nan hma ngeia kawng siam zo tur te, a ṭul anga thawktu tam zawk leh hmanrua tam zawk lak belh tur leh, zawh hun tura an intiamna March 31, 2025 chhunga thawk zo turin kawng siam hna thawktute a chah a ni.