Transport Minister-in tuia inkalpawhna chungchang Union Minister a sawipui

Transport minister Vanlalhlana chuan nimin khan New Delhi-ah Union Ports, Shipping and Waterways (MoPSW) minister Sarbananda Sonowal chu a chênna inah a kâwm a; Transport department-in Inland Water Transport (IWT) atana hma a lak mekte chak lehzuala thawh a nih theih nan hma lakpui turin a ngen.

Sorkar thuchhuah tarlan danin, Mizoram Transport department hnuaiah IWT project pathum - Development of IWT on River Khawthlangtuipui - River Tuichawng te, Development of IWT on River Tlawng (National Waterway-102) leh, Development of IWT River Chhimtuipui kalpui mek a ni.

IWT project-ahte hian techno-economic feasibility neih zawh tawh niin, a ṭhen chu detailed project report (DPR) siam zawh a ni tawh a, la siam zawh lohte pawh peih thuai beisei a ni.

Vanlalhlana hian Tuirial tuikhuah (dam) chu IWT project atan chauh ni lo, zin mite hîp thei tura tourism atana hmuhma ṭha tak awmna a nih thu Union Minister a hrilh a; ruahmanna hlawhtling tak kalpui a nih theih nana zirchianna, feasibility study kalpui a pawimawh thu a sawipui.

Transport Minister hi Transport director R Lalram-mawia’n a ṭawiawm a ni.