ASF vanga vawk thi chhawmdawlna diltu chhungkaw 5,227 an awm tawh

Vawk pùl hri, African Swine Fever (ASF) vanga vawk thite Mizoram sorkarin state disaster-ah a puang a, State Disaster Response Fund (SDRF) kaltlanga chhawmdawlna (assistance) diltu chhungkaw 5,227 an awm tawh.

DMR hotute hnen aṭanga Vanglaini thu dawn danin, kum 2024 chhunga ASF vanga vawk thi, district veterinary officer (DVO)-te'n ASF vanga thi ngei a ni tih an finfiah hnua certificate an pekte chuan an awmna district-a DC/DDMA-te hnenah chhawmdawlna an dil a ni.

DC/DDMA-te'n chhawmdawlna dilna an pawm tawhte chu DMR-ah an thehlut a, Siaha leh Lawngtlai district aṭanga dilnate erawh DMR-in an la dawng lo.

SDRF hian chhiatna (disaster) chhawmdawlna atan cheng nuai 4,800 a neih thu DMR department hotute chuan an sawi a, "Vawk thi chhawmdawlna ang chi kaihhnawihah hian budget aṭanga 10% hman theih a ni a, tunah hian sorkarah 10% (nuai 480) kan dil mek," an ti.

Chhawmdawlna hi SDRF kalphung angin vawk pakhatah Rs 4,000 zel pek theih a ni.

Kum 2024 chhunga ASF vanga harsatna (State Specific Disaster of ASF for 2024) bik atan erawh chuan vawk thi chu eng zat pawh ni se, chhawmdawlna hi chhungkaw pakhat tan vawk paruk chinah bak pek theih a ni lo.

DMR hian nimin thleng khan district pakua aṭangin chhungkaw 5,227-te vawk thi 14,853 atana chhawmdawlna dilna an dawng tawh a ni.