Bána Kaih-ah dilna 11,000 vel lut tawh

Sorkar flagship programme, Bána Kaih (Handholding) Scheme hnuaiah progress partner (ṭanpuina dawngtu) ni turin dilna 11,000 vel a lut tawh a, tun kar aṭangin ṭanpuina dawng turte thlan theih beisei a ni.

Bána Kaih (Handholding) hnuaia dilnate chu an project kaihhnawih sorkar department-te'n an endik a; an thlitfim hnuah Handholding Scheme-a thuneitu sang ber (apex body) - Mizoram State Policy Coordination Committee (MSPCC)-in ṭanpuina dawng turte a thlang dawn a ni.

Vanglaini palai zawhna chhangin MSPCC hotute chuan, Bana Kaih hnuaiah progress partner ni tura dilna 11,000 vel a luh tawh thu an sawi a; ṭanpuina dawng turte thlan hun chungchang zawhna chhangin, "Tunkarah kan ti chho ang," an ti.

Bána Kaih hnuaiah hian scheme kalpuitu implementing department 16 a awm a; chu'ng department 16-ah chuan eizawnna tur trade 155 a awm.

The Mizoram Bana Kaih (Handholding) Scheme, 2024 booklet-in a tarlan dan chuan, state sorkar aṭangin scheme budget atan sorkar kum 2024-25 ah cheng vbc. 200 dah a ni a; scheme/source dang aṭang pawhin sum a awm tura ngaih a ni bawk.