Phai aṭangin buh chi ṭha lak luh a ni; 'Buhhûm kan lei chhunzawm zel dawn' - Agriculture Minister
Agriculture & Farmer Welfare minister PC Vanlalruata chuan, Mizoram sorkarin Mizorama thar buhhûm lei chhunzawm zel a tum thu leh, phai lam aṭanga buh chi ṭha an la lut a, Mizorama loneitute chìntir an tum thu a sawi.
PC Vanlalruata chuan chanchinbumite zawhna chhángin December 19, 2024 aṭangin Mizorama buh tharte sorkarin a lei ṭan thu a sawi a, "Buhhûm lei hi kumin kum tharah pawh hian kan chhunzawm leh dawn. Kg khat Rs 30-a sorkarin kan lo leisak hi kan han her ang a, Supply department lamin ration-a sem turin an lo lei chhawng ve leh ang," a ti.
Mizoram sorkarin Paddy & Rice Procure-ment Committee a din tih sawiin Minister chuan, "Chumi kal zel chuan Mizorama buh thar a pun theihna turin ruahmanna a siam a, ruahman dan chuan, kar khatah vawi khat a lei ni tur kan siam dawn," a ti a; hmun hrang hrangah collection centre (leina hmun) an siam rih lo a, buh thartu, buhhûm hralh duhte chuan Pangbalkawnah an phurh thlen thu a sawi.
PC Vanlalruata chuan, "Mizorama kan buh thar ang angte vai rama lut thla ṭhin kha tunah chuan Silchar aiin a rate a lo ṭha zawk tawh bawk a, Mizoramah kan lei ta a, kan farmer-te pawh an lawm thawkhat viau a ni," a ti.
Agriculture Minister chuan, nikum 2024 khan phai lam aṭangin buh chi ṭha an la lut tih sawiin, "Agriculture demonstration farm-ah kan chíng pung a, ni 100 chhunga thar thei a nih bakah a tui em em a, kuminah hian loneitu a tam thei ang ber chintir kan tum dawn," a ti a; Kolasib leh Mamit district-ah pilot project angin an kalpui phawt ang a, district dangah an pakai zel tur thu a sawi.
Phai lam aṭanga buh chi ṭha an lak luh chu Mizoramah buhfai, buhhûm thar a pun an duh vang a nih thu sawiin PC Vanlalruata chuan, "Buh thar a pun theihna turin sorkarin lost (hloh) huamin hma kan la a, a fuh turah kan ngai. Buha intodelh chu kan la pha lo viau nachungin, kan potential area (buh chìn theihna hmun)-ahte buh chìn leh thar a pun theihna turin tunah hian sorkarin a kalpui mek a ni," a ti.