KHAWTHLIR

Vaccine pek dan tur sawiho

Lunglei District Task Force for Immunisation chu an chairman Navneet Mann, district bawrhsap hoin nimin khan DC conference hall-ah an ṭhu a; naupang leh naupaite hnena natna hri leng inkai chhâwn theih laka invenna damdawi (vaccine) pek ṭhin (routine immunisation) kalpui chhunzawm dan tur an sawiho.

National Children's Science Congress

January 3-5, 2025 chhung khan Madhya Pradesh khawpui Bhopal-a Ranvirdra Bhavan-ah National Children's Science Congress buatsaih a ni a, Mizoram aṭangin zirlai pariat an tel. Science Congress thupui 'Understanding ecosystem for health and wellbeing' tih hmangin zirlaite chu an thil zir bingna project hmangin an intihsiak a, Mizoram aiawha telte hian January 3 & 4 khan presentation an ti a, January 5 khan poster presentation an ti thung. Cultural programme-ah Chheihlâm an entir bawk. Mizoram naupangte hi zirtirtu pangain an hruai a ni.

Raltlante pual Football inelna

Lai Autonomous District Council-a chief executive member (CEM) C Lalmuanthanga chuan nimin khan Central YLA Playground-ah Lawngtlai leh a chhehvela raltlan awmte tana buatsaih football tournament a hawng. CEM chuan, ráltlânte chu mikhual an ni tih hre reng tur leh anmahni mikhualtute tan hnawksaka awm lo turin a chah. Lawngtlai district-ah hian Myanmar, Bangladesh leh Manipur aṭangin raltlan mi 8,020 an awm mek a; football tournament hi raltlante fuih thar nan leh inunauna ṭha zawk a awmna tura buatsaih a ni.

Chhungkaw Ni

Salvation Army-te chuan kum tin Pathianni hmasa bera Chhungkaw Ni an hman ṭhin chu January 5, Pathianni pawh khan chawhma inkhawmah corps leh society hrang hrangah an hmang. Salvation Army-in Family Sunday an hmannaah hian thuchah sawitute'n chhungkaw pawimawhna chungchang an sawi a ni. Zanin hian Chhungkaw Zan an hmang leh dawn a, chhungkaw tinte anmahni in ṭheuhah zan dar 8-ah an inkhawm dawn a, thupui chu 'Krista ang tura tihdanglam' tih a ni ang.