FMR tihtawpna hlîp turin ngen

Zo Re-unification Organisation (ZORO) chuan thuchhuah siamin, India sorkarin Free Movement Regime (FMR) titawp a, India-Myanmar ramri kân tura phalna lak a ngai ta chu pawi an tih thu leh, FMR tihtawpna hlip leh ngei tura sorkar laipui an ngen thu an tarlang.

ZORO chuan, "FMR titawp a, India-Myanmar ramri kân tura border crossing permit lak a ngai ta hi pawi kan ti em em a, UN Declaration on the Rights of Indigenous Peoples 2007 Articles 36 (1) & (2)-a kan dikna chanvo rahbehna a ni. Sorkar laipui hian FMR a tihtawpna hi hlîp leh ngei turin kan ngen a, he kan dikna chanvo nei let leh tur hian a tawp thlengin kan bei zel ang," an ti.

Sorkar laipuia Ministry of Home Affairs (Border Management-I Division) lehkha no. 1/76/2424-BM-II dated 24th December 2024 chuan Mizoram Chief Secretary hnenah lehkha thawnin, India-Myanmar ramri kân dan tur a rawn hriattir. Chumi zûlzui chuan Mizoram Home department-in lehkha no. 22019/3/2022-HM(FMR) Vol-II dated 30th December 2024-ah DGP, Mizoram hnenah ramria hma lak dan tur a thawn a, chumi ang chuan Champhai SP-in mipui hriattirna a tichhuak a ni.

ZORO chuan, United Nations Declaration on the Rights of Indigenous Peoples 2007 Article 36-ah, "Tualchhuak hnamte, a bik takin khawvel sorkar ramri khamin a ṭhendarhte chu an inkalpawhin an inṭanpui ang a, sakhaw thil leh khawtlang thil, ei leh bar leh politics-ahte anmahni mi leh sate nen inpawha inpawlho theihna dikna chanvo an nei,' tih a nih thu an tarlang. 'Ram roreltute chuan tualchhuak hnamte nena inberáwnin hetiang dikna chanvote hi tipuitling turin hma a la ang,' tih a nih thu an tarlang bawk.

India sorkar chu UN General Assembly-a Declaration ṭha tia vote-tu a nih thu tarangin ZORO chuan, "Tunah UN Declaration on the Rights of Indigenous Peoples 2007 dodal zawngin hma a la a, tun hma aṭanga Zo fate'n zalen taka kan inkalpawhna FMR chu a ṭhiat ta a ni," an ti.