Kolasib Dist. MJA-in chak zawka NH siam a nih theih nan bawhzui an rêl

Mizoram Journalists' Association (MJA), Kolasib District chuan nimin khan Kolasib Press Club-ah Annual Conference an hmang a; Kolasib district chhunga national highway siam leh thlúr lia kawngpui zauh turah chak zawka hmalak a nih theih nan a ṭul anga bawhzui an rel.

Kolasib MJA inkhawmpui hi president Andrew Vanlalauva a kaihruai a; rorelin, "Kolasib district chhunga NH siam ṭhat mek leh four lane kawngpui siam chungchangah chak zawka hmalak a nih theih nan MJA-te'n a ṭul angin bawhzui ni se," an ti.

Kolasib district-a ramri duty police-te an dinhmun zir chiang tura a hmuna tlawh te, Kolasib Press Club sak mek chu kumina hawn hman ngei turin hmalak te, Kolasib district MJA-te kumin chhunga fehchhuahna hun neihte an rêl bawk.

Chawhnu lamah vice president C Zomuanpuia'n inkhawm a kaihruai a, Kolasib SDO (Sadar) H Lalramliana'n a hmanpui a, Executive member R Lalhmingthanga'n 'Changing nature of the press' tih thupui a sawi.

H Lalramliana chuan, Mizo zingah fa nei tam duh an tlem zel tih sawiin, "Kum tin mitthi kan pun laiin, nau piang kan kiam zel a, hei hi ram leh hnam than zelna tura harsatna min thlentu a ni dawn. Fa nei tam tura inzirtirna kawngah MJA-te'n hmalak a ṭul," a ti a; journalist-te chu taima tur leh finfiah ngam chanchin thar puang chhuak zel turin a fuih.

Kolasib MJA president Andrew Vanlalauva chuan, MJA-te chu ram leh khawtlang tana ṭangkaina nei thei pawl a nih angin member-te intuaithar zel a pawimawh thu a sawi a, "Thiamna thar lo chhuak zelah media mite hi kan hnathawhnaah tunlai thiamna thar hmang ṭangkai tura inzir peih a ngai," a ti a; MJA member-te lungrual taka thawkho a, ram leh khawtlang tana ke pênho turin a sâwm bawk.