Sorkarin gas man bithliah thar

Food, Civil Supplies & Consumer Affairs (FCSCA) department chuan Indian Oil Corporation-in eirawngbawlna gas (LPG) man a tihchhuah thar zûlzuiin gas man thar a bitliah thar a, January 1, 2025 aṭangin hman ṭan a ni. Domestic cylinder (kg 14.2) man tihdanglam a ni lo.

FCSCA department tarlan danin, Vairengte tih loh hmun dang zawngah domestic cylinder (kg. 14.2) man Rs 955, commercial cylinder (kg. 19) man Rs 2,256, XtraTej (kg. 19) man Rs 2,278.50 leh composite (kg. 10) man Rs 638 a ni. Vairengteah chuan domestic cylinder Rs 946, commercial cylinder Rs 2,240, XtraTeJ Rs 2,262.50 leh composite Rs 633 a ni thung.

Aizawl leh district headquarters-ahte home delivery kalpui tur a nih avangin, home delivery a nih chuan domestic cylinder-ah a man pangngai aṭangin Rs 70 aia tam lo belh tur a ni a; agency/distributor kudama hralh a nih chuan a man pangngai aṭangin Rs 33.43 paih tur a ni thung. Home delivery la kalpui lohna, point delivery kalpuinaah chuan a man pangngai aṭangin Rs 7.53 belh tur a ni.

LPG distributor-te'n an châwm thingtlang khuaah chuan, khaw hlat zawng leh pawisa chawi belh ngai zat chu January 21, 2015-a sorkar thupekin a tarlan anga chhût tur a ni bawk.