Food, Civil Supplies & Consumer Affairs (FCSCA) minister B Lalchhanzova chuan, ration card var tan buhfai man tihsan a ni dawn a, buhfaia VIP quota tihtawp a nih dawn thu leh retailer-te lawmman a pun dawn thute a sawi a, "He ruahmannaah hian a mawhphurtu ka ni," a ti.

FCSCA Minister hian nimin khan Aizawl Press Club-ah thuthar thehdarhtute a kâwm a; mawhphurhna pek a nih aṭangin Mizoramin buhfai a châwk luh dan, sum sèn dan leh enkawl dante uluk taka a zir thu sawiin, "Kan buhfai enkawl mek danah hian kan hotute hnenah rawtna ka thlen," a ti a, a rawtnate chu June 18, 2024-a Council of Minister-in a ngaihtuah thu a sawi.

Council of Minister ṭhukhawm chuan Chief Minister, minister, MLA leh group A officer-te tana buhfai quota lei ṭhin tihtawp a rêl thu sawiin Minister chuan, "Hma hruai ila, khawsak harsa lote pawh ngen zel ni se tih a ni. Buhfai kg. khata subsidy Rs 25 kan pek ṭhin chu Rs 10-ah tihniamin, card var hmangtute'n kg. khat Rs 15-a an khul ṭhin chu Rs 30-in an khul tawh ang," a ti.

Supply Minister chuan, retailer-te lawm­man ennawn a nih thu sawiin, "Buhfai kg. khata Rs 0.50 an hlawh ṭhin chu Rs 1.50-ah tihsan a ni dawn," a ti a; retailer-te lawmman chu National Food Security Act (NFSA) bikah sorkar laipuiin quintal khatah Rs 135 leh state-in quintal khatah Rs 45 an tum ṭhin thu a sawi.

FCSCA Minister sawi danin, card var tana subsidy ennawn hian NFSA dawngtu card eng leh card pawl hmangtute a nghawng ve dawn lo. He hmalakna avang hian sorkarin thla tin cheng nuai 525 a hum thei dawn a, kum khatah chuan cheng nuai 6,311 a hum thei dawn. Tun hma chuan kum khatah buhfai subsidy-ah cheng nuai 13,500 vel sèn ṭhin a ni a, ruahmanna tharah chuan cheng nuai 8,000 vel sèn a ngai tawh ang.

Ration card varte tana buhfai man bituk thar chu October 2024-ah hman ṭan tum a ni a; Chief Minister, minister, MLA leh group A officer-te tana buhfai lei tihtawp chu September 2024-ah hman ṭan tum a ni.

B Lalchhanzova chuan, he hmalakna avang hian mipuiin buhfai bûk dik an lak theih phah an beisei tih sawiin, "Retailer leh Supply department-te thil ti dik lo ṭhin anga rin kan ni reng hi kan ram leh khawtlang nun atan a hrisel lo. Hei hi chinfel theih ngei kan beisei. He hmalakna hi min thlawpa, min ṭawiawm turin mipui ka ngen a ni," a ti.

Supply Minister chuan, NFSA-a awm tur thlan danah ramri kham mumal a har thu sawiin, "Tun dinhmunah mi harsa tak tak, NFSA-a awm mamawh ngawih ngawih, card vara awm si an awm nual tih hriat a ni. Hemi chingfel tur hian hma kan la mek a, khawpuia cheng chhungkua kum khata Rs 4,00,000 la lut lo leh thingtlanga cheng Rs 2,50,000 la lut lo rîn luh tum a ni," a ti a, hma an lak mek thu a sawi.

Ruahmanna thar an siamah amah nawrtu an awm lo tih sawiin B Lalchhanzova chuan, "Kan CM emaw, hotu dang min nawrtu an awm lo. Uluk taka India ram state dangte dinhmun leh kan state dinhmun ka zir hnuah ruahmanna siam ka ni. State dangah chuan NFSA ni lo tan buhfai an lei ngai lo. Politics taka beih ngai an awm chuan keimah hi beih tur ka a ni. Ka mawhphurhna liau liau a ni," a ti.

FCSCA Minister chuan ruahmanna thar avangin Mizoram sorkarin sum tam tak a hum theih dawn thu leh sum humte chu thil dangah ṭangkai taka hman theih a nih tur thu a sawi bawk.